SHILLONG: Roster system aro gipin nangchongmotgipa kamrangni bidingo chanchirimna gita a·dokni Chief Minister Conrad K Sangma, bakan Meghalaya Democratic Alliance (MDA)-ni tom·aniko ong·atna ka·dongenga ine Mongolbar salo, Meghalaya a·dokni BJP Minister Alexander Laloo Hek parakataha.
Iani bidingo kobor ra·timgipa manderang baksa agangrikengon, ua Sombar salosan a·dokni Chief Minister-ko gronge iani bidingo agangrikaha ine Hek parakataha.
BJP Minister-ni parakatani gitade, roster system-ko mikkangchini giminsa nie tarichina ua an·tangba nangnikenga.
Meghalaya a·dokni state reservation policy-ko nipiltaina nanggenchim ong·ode jinma apsan tom·e chanchirimna gita nanggen ineba Hek parakataha.
Iani bidingo BJP-ni gita dingtangmancha committee-ko songmanaha aro ia committee-ko a·dokni gitcham MLA HM Shangpliang-an convenor ong·e dilenga ineba ua parakataha.
Hek-ni parakatani gitade, ia committee-ni gipin membor-rangara, BJP-ni MLA Sanbor Shullai, BJP-ni state president Ernest Mawrie, BJP-ni ku·wattimgipa M Kharkrang, BJP-ni legal adviser-rang, Vivan G Kynta aro SP Mahanta baksana Garo Hills-ni BJP dilgiparang, chong·motan Edmund K Sangma aro Ferlin CA Sangma ong·a.