TURA: North Garo Hills a·jao donggipa Food Processing Centre-ni official-rang tangka paisarangko jakkalsretani a·sel jolni manderang maming namgnirangko man·jaenga ine jolni dingtang dingtang NGO-rang, North Garo Hills a·jani Deputy Commissioner-na badi ka·doangenba, tangka paisa jakkalsretgipa official-rangni kosako rakgipa ja·kurangko de·china aro mikkangchi nambate hisaprangko rakkichina gita didiataha.
North Garo Hills a·jani dingtang dingtang NGO-rang, chong·motan GSU, AYWO, AHAM, FAF aro uandakgipa gipin dolrangni parakatani gitade, Food Processing Centre-ni bidingo RTI ka·on, official-rangni chu·gimik korosrangko mesokna gita man·jahachim.
“Chingni RTI ka·anina report-ko on·anio chu·gimik hisaprangko chingna mesoke on·na man·jaha aro ian RTI Act-ko pe·ani gita ong·aha. Kamko ka·anio iandake dongnue dakaniara chingna chu·ongnikgijaniko ra·baaha,” ine NGO-rang parakataha.
Food Processing Centre-ko official-rang, PPP mode-ona dingtangatna jotton ka·ahachim ineba NGO-rang, Deputy Commissioner-na badi ka·doangaha.
“Food Processing Centre-ko officer-rangni PPP mode-ona ra·jitna jotton ka·anikoba chinga raken jegalenga. North Garo Hills a·jani namgnina on·gimin tangka paisarangko PPP-ona apjitna gita nangja,” ine NGO-rang parakataha.