TURA: Meghalaya Job Reservation Policy-ko nipiltaichina aro roster system-ko mikkangchinasa tarichina badiaba badiaba dolrang dabitokengon, A·chikrangna on·gimin bilko pe·gale iandakgipa dolrangni dabianirangko knachakjachina aro Job Reservation Policy-ko dangtapjachina gita didie, Tura-ni New Tura Development Forum (NTDF), Tura Garo Senior Citizens Forum (TGSCF), Garo Graduates Union (GGU) aro dingtang dingtang dolrang, a·dokni Chief Minister Conrad K Sangma-na sedoataha.
“Job Reservation Policy-ko ra·gatchengaonin A·chikrang, an·tangtangni man·na nanggipa bak rengsirangko gimaatna nangaha, uni gimin Job Reservation Policy-o on·gimin niamrangko dangtapgija, skango jekai ong·a ugitan donaichina chinga nang·ko mol·molatenga,” ine Chief Minister-na sedoatgipa memorandum-o ia dolrang parakataha.
Job Reservation Policy-ko nipiltaichina dabienggipa mitam dolrang, A·chikrangni bak rengsikoba ra·e katna miksongkuenga ine janapatengon, “Roster system-ko mikkangchinasa tarie ra·gatchina mitam dolrang bilake dabitokengani a·sel A·chikrang aro Khasi-Jaintia-rangni gisepo nangrime songdongbaani da·o jajrengna nanganiona sokengaha aro iandake dabiangkuaia ong·ode ja·mano ia jatrangni gisepo meli nangrimani dongsrangjawaha aro jatgnian an·tangtangna chamgimin bak rengsikoba gimaatani cholrang dongenga,” ine kosako janapgimin dolrang parakataha.
“A·dokni reservation policy-ara namen simsakbena nanggipa kamsa ong·a aro ia policy-ko da·o skatang dangdikgenchimode da·o 40:40% ong·aoni ja·mano a·dok gimiko Garo aro Khasi-Jaintia gimiknan 50 percent-ona tang·onangsrangnaba gnang. Uni gimin Reservation Policy-ko nipiltaiani gimin Assembly-o ba Assembly-ni a·paloba chanchirimna nangani katta dongja,” ine ia dolrang parakataha.
A·chikrangni bak rengsiko ra·e katna miksonge ia Reservation Policy-ni bidingo mitam dolrang changni chang Assembly-ona ra·baenga ine janapatengon, Job Reservation Policy-o on·gimin niamrangko skango gitan donaichina aro 1972 bilsini January jao Reservation Policy-ko a·bachengata intalan roster system-koba ra·gatchina NTDF, TGSCF, GGU aro gipin dolrang, a·dokni Chief Minister-ko didiataha.