TURA: Sukrobar salo, a·dokni Chief Minister Conrad K Sangma, East aro West Garo Hills a·ja damgnini official-rang baksa Nokrek a·brini ja·reko donggipa Daribok songona re·ange, gital rikmangipa aro da·o rikenggipa biaprangko nieaha aro ia biapko nina aro rona re·angenggipa manderangko skatang jabol galjachina aro rongtal an·talaniko rakkichina didiatjolaha.
Daribok songo niwatgipa biapko re·anggipa bilsion a·dok sorkari tariahachim aro da·o salantian ritchani ritcha manderang, ia biapko nina aro rona gita re·angrongtokengachim.
Salantian ritchani ritcha manderang, ia biapko nina re·angengani gimin ian jolo songdongenggipa manderangnaba dokkanrangko dake cha·na cholrangko on·skaengachim.
Re·anggipa bilsio tarigipa biaprangko aro da·o ia biapo gital rikenggipa nokrangko nieani somoio a·dokni Chief Minister, kobor ra·timgipa manderang baksa agangrikengon, ia biaprango skatang jabolrangko galjana gita aro jabol galanirangko name nirokna gita nangenga ine parakataha.
Ia biapara Nokrek a·brini ja·reko donggipa biap ong·ani gimin manderangni rona re·angenganichi Nokrek Biosphere Reserve-na maming nangchakeani dongjana gita Nokrek a·brini chel·aosa garirangko donna on·china aro rona re·angenggipa manderangna ia biapo napna gita tikitrangko on·china gita songni nokni manderang baksa agangrikchina ua, district administration aro tourist officer-rangko didiangaha.
Dingtang dingtang biaprangoni re·baenggipa tourist-rangko Daribok-ona salrurana gita a·dok sorkari, bijolichi chalaigipa garirangko ra·bagen ineba Chief Minister parakataha.
Jolo songdongenggipa manderangni namgnina ia jolrango pangkamgipa tourism-ko ra·bana gita sorkari, songni nokni manderang baksa agangrikgen ineba ua parakataha.
Ia biapko nieani somoio a·dokni Chief Minister, dingtangmancha samtangtango ong·telaigiparangko chel·chakna kam ka·enggipa Sadhana Forest Information & Learning Centre-koba niangjolaha.
