BAGHMARA: Pangna bilsian wachini somoirango a·sel ong·anirangchi manderangni janggirang aro ma·manti gam-jinrang nisigalako man·rongna nangani gimin ia bilsioba wachini somoiona tarisamsoaniko nipilna gita Sukrobar salo, dingtangmancha official-rangni tom·aniko Baghmara-ni District Resource Centre-o ong·atangaha aro ia tom·aniko South Garo Hills a·jani Deputy Commissioner aro District Disaster Management Authority (DDMA)-ni Chairman S Awasthi dilangaha.
Ia tom·anio Baghmara-ni District Disaster Management Officer Pipson Ch Marak, uni department-ni gita tarisamsoanirangko talate on·angengon, batanggimin bilsirango a·arang ruronganichi manderangni janggirangko gimaatna nangahani gimin manderangna dakchakanirangko on·na gita tarisamsoanirangko talate on·angaha.
Iandake a·sel ong·ani somoirango duko ga·akgipa nokdangrangna State Disaster Response Fund aro National Disaster Response Fund-ni ning·o gital dake on·enggipa dakchakanirangni gimin janapatengon, 2022-23 bilsioni 2025-26 bilsiona plain jolrango donggipa pucca nok te·prakna gong 1,20,000-ko aro a·brirango donggipa kutcha nokrangna gong 1,30,000-ko on·gen ine Marak parakataha.
Nokrang tong·sa nosto ong·atako man·anio pucca nokrangna gong 65,000 aro kutcha nokrangna gong 4,000 ka·e on·an baksana matchu nolrangnaba gong 3000 ka·e on·ani donggen ine Marak parakataha.
A·sel ong·anio sianggipa mandeni nokdangna gong lak 4-ko aro saknaa man·gipa manderangna gong 74,000-oni gong lak 2.50-ona on·ani donggen ineba Marak aganaha.
Ia tom·anio South Garo Hills a·jani Deputy Commissioner S Awasthi-ba officer-rang baksa chanchirimangengon, a·sel ong·ani somoirango nangenggipa manderangna dakchakanirangko on·na man·na gita pangnan mikrake dongchina a·jani officer-rangko didiangaha.
Ia tom·anio dongpae bakko ra·anggipa gipin manderangara, South Garo Hills a·jani ADC Dr Challang Marak, BDO-rang aro dingtang dingtang department-ni officer-rang ong·a.
