SHILLONG: Bharatiya Janata Party (BJP)-ni national president JP Nadda-na dongimin somoiko 2024 bilsini June jaona ra·dodapatahani gimin da·o dipet BJP-ni maming election-rangko ong·atna man·kujawa ine Sombar salo, Meghalaya BJP-ni state president Ernest Mawrie parakataha.
Meghalaya BJP-ni gital state president-ko seokna gita election-ko ong·atchina BJP-ni minister AL Hek aganahani gimin BJP-ni state president Ernest Mawrie, ia kattarangko aganchakataha.
Mawrie-ni parakatani gitade, Hek-ni agangipa kattarangara ua an·tangni chanchianiko agananisan ong·aia aro state president-na dongimin somoiara bilsigni ong·ja indiba bilsi gittamsachim.
“Angna dongimin somoi bon·ahachim indiba ia bilsio National Executive Committee-ni tom·aniko Delhi-o ong·atanio BJP-ni national president JP Nadda-ni term-ko 2024 bilsini June jaona ra·doataha ine a·songni Defence Minister Rajnath Singh parakatahani gimin da·o national president-ko seokna election-ko ong·atani bidingo ma·mong parakatkujaskal BJP-ni maming election-rangko ong·atna man·kujawa,” ine BJP-ni state president parakataha.
State president-na dongimin somoi bilsignisanchim ine Hek-ni agananiko jegalatengon, Hek an·tangan 2003 bilsioni 2006 bilsiona bilsi gittamna state president ong·angahachim indide ua maikai state president-na dongimin somoiara bilsignisan ine aganna man·aha ineba Mawrie sing·doataha.
Meghalaya a·doko BJP-ni gital president-ko seokani somoi ong·engaha ine Robibar salosan BJP-ni dilgipa aro a·dokni Cabinet Minister Alexander Laloo Hek parakatenba, gital president-ko seokna gita election-ko ong·atchina didiangahachim ine nikna man·a.
Ma·mongni BJP dilgiparang namnikgenchimode, ua Meghalaya BJP-ni gital president ong·e kamko ka·na kusi ong·aigen ineba Hek aganahachim.
BJP-ni niam bidikni gitade state president-na dongimin somoiara bilsignisan aro da·o gital state president-ko seokani somoi ong·engaha ineba ua aganahachim.