PRIME Music-ni workshop-ko salgnina ong·ata

TURA: Re·anggipa April-ni 28 aro 29 tarikrango, Durama Association of Music & Arts (DAMA), PRIME Meghalaya baksa nangrime, PRIME Music Incubation-ni workshop-ko Tura-ni PRIME office-o ong·atangaha aro ia workshop-ko ong·atanio Garo Hills-ni dokgipa dam·giparang, producer-rang aro git segiparang bakko ra·angtokaha.
Workshop-ni skanggipa salo, Kolkata-ni Satyajit Ray Film & Television Institute-o poraie matchotbagipa aro Nokpante dolko bikotgipa Mikhail Marak-ni dilanichi Music Production aro Song Writing-ni bidingo skie on·angaha aro unbaksana Rhythm School of Music-ni founder aro skigipa Titto Sangma-ba Career-Oriented Workshop-ni bidingo bak ra·giparangna agan-skie on·angaha.
Workshop-ni gnigipa salo, Delhi-ni saksa dokna dam·na changgipa Ritwik De, Music Production-ni gimin agan-skie on·angskaaha aro uni ja·man No Binary Records-ni Kaushik Barua aro Vikram Singh-ba, workshop-o skie ra·giparangna dokgipa dam·gipa aro git ring·gipa dolrangni dakna nanggnirangni gimin agan-talate on·angaha.