SHILLONG: Meghalaya a·doko koela bikotaniko champengatani da·o bilsi 10 ong·na sipilengahaoba, koela bikotgipa mande sakbrina India sorkari, mining lease ba koela bikotani licence-rangko on·enganichi niamo pangchake a·doko koela bikotaniko a·bachengpiltaienganiara a·doko songdongenggipa manderangna aro mongsongbate koela bikotanio pangchake janggi tangenggipa manderangna gisik ra·beani somoi ong·enga ine Budbar salo, a·dokni Chief Minister Conrad Sangma parakataha.
Niamo pangchake koelarangko bikotna licence-rangko man·enggipa manderang, dingtangmancha a·dokni Chief Minister-na mande ra·pilskaaniko dakna gita Nongstoin-o tom·aniko ong·atanio Chief Minister, ia kattarangko aganaha.
“Bilsi 10 ong·na sipile a·dokni manderang aro mongsongbate koela bikotanio pangchake janggi tangenggipa manderang neng·nikanirangko chagrongna nangtokahani gimin ian gisik ra·beani somoi ong·chongmotenga. Koela bikotaniko champengatanichi a·doko songdongenggipa manderangsan ong·aigija a·dok sorkariba kajinarangko man·jae bang·en noksan ong·na gita nangaha,” ine Sangma aganaha.
India sorkarini Coal Ministry-oniko da·o koela bikotani licence-rangko man·engahani gimin ia pilak obostarang da·o dingtangna siengaha ineba Chief Minister aganaha.
Chief Minister-ni parakatani gitade, a·doko koela bikotgipa mande sakbri, koela bikotani licence-rangko man·engahani gimin da·o uamang a·dokni nanga kamrangko matchotatgen aro uni ja·man manderang baksa chanchirima matchotahaode niamo pangchake koela bikotaniko a·bachengatna man·gnok.
Mikkangchi gipin koela bikotgiparangba ia apsan niamrangkon ja·rikna nanggen ineba Chief Minister aganaha.
Mining lease-rangko on·na ra·chakahani gimin India sorkariko mittelpilangengon, a·doko niam gita aro naljokani gnang koela bikotaniko a·bachengna gita pilak nanga dakchakanirangko on·aha ine Chief Minister, a·songni Prime Minister Narendra Modi aro Union Coal Minister Prahlad Joshi-koba mittelpilataha.
A·doko koela bikotaniko a·bachengpiltaianiara gisik ra·beani somoi ong·enga: CM
Date:
Share post: