SHILLONG: Manipur a·doko Meitei aro dingtang dingtang Tribal jatrang, mongsongbate Kuki jatni gisepo so·sojengjeng ong·anirangko nikna man·angani ja·man Shillong songjinmaoba ia jatgnini gisepo so·sojengjeng ong·aniko aro dakgrik dinggrikaniko champengna gita Sukrobar salo, Meghalaya a·dokni police-rang, ia jatgnini chatro chatrirang baksa Shillong songjinmani Nagaland House-o tom·aniko ong·atangaha.
Manipur a·doko Meitei aro Kuki jatni gisepo dinggrikanirang ong·katani ja·man Shillong songjinmaoba Bristibar attamo, Nongrim Hills-o donggipa Mizo Modern School sambao, ia jatgnini chadamberang adita dinggrikanirang ong·katahani gimin ia jatgnionikon sak 16 manderangko rim·ahachim.
Indake ong·genchimoba, ia sak 16 manderangko tom·tomaniko rakkiangna soi ka·grikatani ja·man watpilaiaha ine a·dokni DGP LR Bishnoi parakataha.
Ia jatgnini gisepo adita jegrikanisan ong·aiani gimin sak 16 manderangko jail-o chipgija watpilataiaha ine DGP parakataha.
Jatgnini chatro chatrirang aro dilgiparang baksa tom·anio a·dokni DGP aganprakengon, mikkangchi Meghalaya a·doko songdongenggipa ia jatgnini gisepo maming ma·sisretgrikanirang dongjana gita tom·tom·aniko rakkiangchina mol·molangaha.
“Imphal songjinmao aro Manipur a·dokni dingtang dingtang biaprango ong·nanggija a·selrang ong·ahani gimin Meghalaya a·dokode ia jatgnini manderangni gisepo maming ma·sisretgrikanirang dongjana gita chinga nangnikaha. Uni gimin ia jatgnini gisepo meli nangrime donganiko rakkiangna gita chinga ia jatgnini dilgiparangko aro chatro chatrirangko okame apsan agangrikangaha,” ine DGP Bishnoi parakataha.
DGP-ni parakatani gitade, Bristibar salo ia jatgnini gisepo jegrikanirang ong·katani ja·man jatgnini dilgiparangkon Laitumkhrah police statin-ona okamataha aro uamang dolgnian tom·tomao janggi tangangna gita ku·rachakaha.