Mining lease-na dorgastoko galani bidingo awareness program-rangko ong·atanggen

SHILLONG:  Meghalaya a·doko koela bikotenggipa mande sakbrini mining lease ba koela bikotani licence-rangko on·na ma·mong sorkari ra·chake da·o a·doko niamo pangchake koela bikotaniko a·bachengpiltaina siengahani gimin licence-rangna dorgastorangko galani bidingo skie on·na gita a·dokni Mining department, dingtang dingtang biaprango awareness program-rangko ong·atanggen.
Meghalaya a·doko koelarangko bikotpiltaina gita kamrangko ka·ahani gimin a·dok sorkariko mittelpilna gita dingtangmancha tom·aniko Khliehriat-o ong·atanio iako a·dokni Chief Minister jinmana parakataha.
Ia tom·aniko ong·atanio Chief Minister baksana a·dokni Deputy Chief Minister Sniawbhalang Dhar, Sutnga-Saipung-ni MLA Santa Mary Shylla aro gipin dilgiparangba bakko ra·angahachim.
Meghalaya a·doko National Green Tribunal (NGT)-ni koela bikotaniko champengatani a·sel koela bikotanio pangchake janggi tangenggipa manderang bang·a neng·nikanirangko chagrongna nangtokahachim ine janapatengon, da·o niamo pangchake koelarangko bikotpiltaina cholko man·enganiara a·dokni manderangna namen gisik ra·beani somoi ong·enga ine Chief Minister parakataha.
“Koela bikotanio pangchake janggi tangenggipa manderangni neng·skime janggi tanganiko nike anga an·chingni a·doko koela bikotaniko a·bachengpiltaina rakbate kamko ka·na draatako man·aha,” ine Sangma aganaha.
NGT-ni champengataniko ra·galpilna gita Supreme Court-ni hukum on·ani ja·man a·dok sorkari, mining plan-ko tarie, niamo pangchake koelarangko bikotna kamrangko ka·aha ineba Chief Minister parakataha.
Meghalaya a·doko niamo pangchake koelarangko bikotna mining plan-ko tarianiara namen rakbegipa kam ong·achim ine janapatengon, “Indita bilsirangna rakbee kamrangko ka·ani ja·man mining plan aro policy-ko tarina man·ahani gimin anga ainni gimin u·i-ma·sigipa, samtangtango ong·telaigiparangni gimin ma·sigipa aro koela bikotenggipa manderang pilakkon mittelpilna ska,” ine Sangma aganaha.
“Uni gimin da·o niamo pangchake koelarangko bikotpiltaina gita mining lease-rangko tariani bidingo Mining department, awareness program-rangko ong·atanggen,” ine Chief Minister parakatenba, licence man·gimin manderangkoba gipin koela bikotgiparangna licence-rangko tarianio dakchake on·china didiataha.
Ia tom·anio, Mining & Geology-ni Secretary E Kharmalki-ba jinmana aganprakangengon, mining lease ba koela bikotani licence-rangko tarina dorgasto galgiparang da·o dipet a·doko sak 17 donga aro sakbrini dorgastorangkoba bakan India sorkariona watdoatgen ine parakataha.