SHILLONG: Meghalaya a·dokni saksa Cabinet minister ong·an baksana uaba BJP-ni membor ong·pae, doltangni namgnina kamko ka·aniara uniba daito ong·a ine Sombar salo, BJP-ni dilgipa aro Cabinet Minister AL Hek parakataha.
BJP state president-na dongimin somoiara bilsignisan aro a·dokni gital state president-ko seokna gita election-ko ong·atna nangengaha ine Hek aganahani gimin adita salrangna skangsan una show cause notice-ko on·na gita BJP-ni state president Ernest Mawrie, chinrangko mesokatahachim ine nikna man·a.
Ma·mongo BJP-ni dilgiparang kusi ong·genchimode ua a·doko BJP-ko president ong·e dilna kusi ong·aigen ineba Hek aganahachim.
BJP-ni state president aro uni gisepo maiba meligrikgijanirang dongengakon ine sing·anina aganchakaniko on·angskaengon, “BJP-ara political dol ong·e a·dokna aro a·dokni manderangna namgipa kamrangko ka·e on·anian chingni daito ong·a. Chinga pangnan doltangko namdapatna gitasa apsan agangrikronga aro da·o dipet chingni gisepo maming meligrikgijanirang dongja,” ine Hek parakataha.
Ua sorkario kamko ka·gipa ong·a aro apsan somoion BJP-ni memborba ong·e doltangni namgnina kamko ka·aniba uni daito ong·a ineba Hek talataniko on·angaha.
An·tangna show cause notice-ko on·ani bidingo janapatengon, doltangni kosako maikoba agangipa ba kamko ka·gipa mandenade iako dakronga indiba ua an·tangde doltangni namgninasan nanga kattarangko aganaiaha ine Hek parakataha.