SHILLONG: Hynniewtrep National Liberation Council (HNLC) bobil dol aro a·dok sorkarini gisepo agangrikani namgipa biterangko bakan nikna man·gnok ine Sombar salo, a·dokni Chief Minister Conrad K Sangma, a·dokni manderangna ku·rachakaniko on·angaha.
“Bobil dol baksa agangrikani kamara altua kam ong·ja aro dolgni agangrikanio dingtang dingtang nina nanganirangba donga. Da·o dipet dolgnini gisepo agangrikani namgipa ramaon ong·enga,” ine Chief Minister kobor ra·timgiparangna parakataha.
HNLC bobil dolko tom·tomaona rimbana gita dolgnini gisepo agangrikanirang a·bachengmanaha ine talataniko on·angengon, HNLC bobil dol baksa sorkari agangrikjringenga aro batanggimin salrangni gisepo sorkari, HNLC bobil dol baksa bang·en agangrikaha ine Chief Minister parakataha.
“Chinga uamang baksa agangrikjringenga aro batanggimin salrangni gisepo sorkari, uamang baksa bang·en agangrikna man·aha,” ine Sangma aganaha.
HNLC bobil dol baksa agangrikaniara dongnue dakna nanggipa kamsa ong·ani gimin da·o dipet iani bidingo jinmana parakna man·kujawa ine janapatengon, da·o dolgnini gisepo agangrikanirang ta·rakbatengaha aro da·o mikkangchide HNLC bobil dol baksa agangrikani namgipa biterangkoba sorkari nikna ka·dongengaha ine Chief Minister parakataha.
HNLC bobil dol baksa agangrikaniko a·bachengatna gita re·anggipa bilsion Meghalaya sorkari, kamoni neng·takgimin IAS officer Peter S Dkhar-ko ku·baltitimgipana seokahachim aro uko ia kamo gitcham IPS officer AK Mishra dakchakengachim.
Ja·mano HNLC bobil dolni gitaba, sorkari baksa agangrikna Hynniewtrep National Youth Front (HNYF)-ni president Sadon K Blah-ko an·tangtangni pal ku·baltitimgipana seokskaahachim.
Sorkari baksa agangrikaniko a·bachengna gita re·anggipa bilsini August 25 tarikon, HNLC bobil dolni sakbonga dilgiparang a·dokona sokbaahachim.