TURA: Mikkarang chu·onga gita wakujaskal, Meghalaya a·doko bijoliko kimitna nangaon ga·akuaigen ine Sombar salo, a·dokni Power Minister AL Mondal parakataha.
“Meghalaya a·doko donggipa chiringrangonikosa bijoliko bikotna man·enga aro da·o chiringrang pilakan tipengahani gimin bijolirangko bikotna gita man·jaenga. Indakmiting somoio chinga nosto ong·e dongenggipa kolrangko tarina somoirangko jakkalskaenga aro mikkarang chu·onga gita waahaode chinga maming neng·nikani gri bijoliko on·na man·gnok,” ine Mondal parakataha.
Garo Hills-ni Ganol project-o sorkari ka·donge nisengenga aro ia project-ko ia bilsini gisepon a·bachengatna krengenga ineba Power Minister parakataha.
“Ia project-ko chu·gimik a·bachengatna man·ahaode a·doko songdongenggipa manderangna aro mongsongbate Garo Hills-na rang·speaniko on·na man·gnok,” ine ua aganaha.
Indake ong·engon, Garo Hills jolrango load shedding ba bijoli kimitani somoiko dingtangatsimengani gimin dingtang dingtang dolrang aro jolo songdongenggipa manderang suk ong·gijaniko parakattokaha.
“Ia sal somoirango ding·a batengani a·sel manderang dongtogijanirangko man·engon, walni 11 bajioni 2 bajiona bijoliko kimitaniara namen ra·chakna man·gijani ong·enga,” ine Garo Hills-ni mitam dolrang parakataha.
Garo Hills-o songdongenggipa mitam manderangni parakatani gitade, bijoli kimitani somoiko dingtangsimsimengani a·selan uamang somoiko ja·rikanio neng·nikanirangkoba chagrongna nangenga.
“Mija antimangmangsan wal 11 bajioni 1 bajiona bijoliko kimitachim indiba da·o 11 bajioni 2 bajiona bijoliko kimitengani a·sel namen chaktogijanirangko man·na nangengaha,” ine uamang parakataha.