AMPATI: Budbar salo, New Delhi-o donggipa National Commission for Women (NCW)-ni membor Delina Khongdup, South West Garo Hills a·jaona re·angenba, One Stop Centre (OSC), Swadhar Greha (Girls’ Home) aro Shelter Home-rangko niangaha. Ia biaprangko niangani somoio NCW-ni membor baksa South West Garo Hills a·jani Deputy Commissioner RP Marak, ADC PK Sangma, Additional SP TD Sangma, Betasing-ni BDO CRN Sangma, DSWO ZR Marak aro gipin officer-rangba dongpaaha.
Chengkompara-o gital rikenggipa OSC building-ko niangengon, gnigipa bakni tangka paisarangko man·sokujae ia building-ko man·chotna man·kujaengani gimin ua iani bidingo Ministry baksa agangrike, ia building-ko ta·rake matchotatna jotton ka·gen ine NCW-ni membor ku·rachakaniko on·angaha.
Official-rangni u·iatani gitade, da·o dipet OSC-ko DRDA building-osa chalaina nangengani gimin ia building-o gipin office-rangba donge, ia one stop centre-o dongenggipa manderang, name dongna gita man·tokkujaengachim.
Ia OSC-ni official-rang, chong·motan Centre Manager Sengera RM Marak, Para-Legal Cara R Sangma aro Counsellor Rajini Marak baksaba NCW-ni membor, adita somoirangna agangrikangaha aro ia centre-o segatgipa case-rangko nipilangenba, ia OSC-ko chalaianio an·tangni chu·ongnikaniko parakangaha.
OSC-ni bidingo songni nokni me·chikrangna u·iatchina aro maikai ia centre-o me·chikrang dingtang dingtang dakchakanirangko ra·na man·gen, uarangni bidingo talate on·china gitaba Khongdup, OSC-ni official-rangko didiangaha.
