SHILLONG: Shillong songjinmao donggipa Jaiaw Presbyterian Higher Secondary School-ni centenary ba bilsi 100 gapaniko Mongolbar saloni manina a·bachengataha aro ia manianiko a·dokni Chief Minister Conrad K Sangma-ni jakchi a·bachengate on·angaha.
Ia skulni bilsi 100 gapaniko manichakatanio Meghalaya State Planning Board-ni Chairman Metbah Lyngdoh, skulni managing committee, skigiparang, gitcham chatro chatrirang, da·o poraienggipa chatro chatrirang aro gipin dilgiparangba bakko ra·angtokaha.
Ia skulni bilsi 100 gapaniko manichakatanio a·dokni Chief Minister, mongsonggipa sokgipa ong·e, tom·anio dongpae bak ra·giparangna aganprakangengon, ia skulko bimang ong·atani ja·man indita bilsirangna lekka porani a·bako tang·doatna aro chatro chatrirangni namgnina bang·en on·gilahani gimin ia skulko kulidilgipa manderangko, skulni managing committee-ko, skulni skigiparangko aro ia skulko chalaianio bak ong·enggipa pilak manderangkon mittelpilangaha.
“Ia skulni bilsi 100 gapanio rakbee kamrangko ka·dilgipa pilak manderangkon anga mittelpilna ska aro ia skulni indita bilsirangna re·mikkanganio chu·sokgipa ong·aniko nike na·simang pilakan gisiko chu·ongnikaniko man·enggen ine anga bebera·a,” ine Chief Minister aganaha.
Ia salara batanggimin bilsirango ia skulni chu·sokanirangko nipiltaiani somoiba ong·enga ine janapatengon, mikkangchi ia skulni namgnina aro chatro chatrirangna nambata lekka porako on·angkuna gita dingtangmancha chanchisamsoe aro nisanko done kamko ka·angkuna gita nangenga ine Sangma parakataha.
“An·ching kamrangna re·mikkangengon, nisanko dongenchimosa kamrangko ka·na ramarangkoba nikgen aro kamrangko chu·sokatna gita niksamsoanirangba donggen. Uni gimin ia cholko ra·e anga skulni managing committee, mondolini membor-rang, gitcham chatro chatrirang aro skulo bak ong·enggipa pilakkon nisan done kamko ka·angkuchina didienga,” ine Chief Minister aganaha.
Meghalaya a·doko dingtang dingtang skulrangna a·dok sorkari, gong kror 2200-na baten bilsio koros ka·enga ineba ia tom·anio Chief Minister parakataha.
Ia skulna nokrangko rikdapna gita Chief Minister’s Special Development Fund-oniko gong lak 20 tangkarangko chamatgen ineba Chief Minister ku·rachakaniko on·angaha.