TURA: West Garo Hills a·jani Rongram Block ning·o donggipa dingtang dingtang songrangona BJP-ni dilgiparang wenange songni manderang baksa agangrikon, ma·mong sorkarini ra·gate on·gipa dingtang dingtang scheme-rangko man·tokjaenga ine ma·sina man·aha ine Robibar salo, Tura-ni BJP MDC Bernard N Marak parakataha.
“Robibar salo chinga Rongram block-ni ning·o dingtang dingtang songrangona wenangon, Gram Sevak circle damsani ning·on bang·bea songrang, JJM, PMAY, Saubhagya, PMGSY aro uandakgipa dingtang dingtang scheme-rangko man·tokjaenga ine ma·sina man·aha. Badiaba badiaba songrangode Saubhagya ba Pradhan Mantri Sahaj Bijli Har Ghar Yojana aro songo noko donggiparangna bijoli on·aniko man·tokjaengani a·sel andalaon dongna nangtokenga,” ine Marak parakataha.
Marak-ni parakatani gitade, ia block-ni ning·o donggipa mitam songrangode PMGSY-ni ning·o rama jal·langrangko tarie on·anirang aro ramarangko taridape on·anirang dongjani a·sel songni manderang re·a doanirango neng·nikanirangko chagrongna nangtokenga ineba BJP-ni dilgiparang ma·sina man·aha.
Mitam songrangode bilsi 60 batgimin manderangna on·enggipa old age pension-koba man·tokjaenga aro game ge·e cha·giparangba PM KISAN scheme-ni maming namgnirangko man·tokjaenga ine Tura MDC parakataha.
“Ia songrango bang·a nokdangrangan PMAY scheme-ni namgnirangko man·jae kutcha nokrangosa dongna nangtokenga aro mitam nokdangrangde jaanti indin on·enggipa merongrangkoba man·jaenga ine chingna badi ka·aha. Uni gimin iandakgipa badi ka·anirangko gram sevak aro block-rang baksa name am·sandina nangenga,” ine Marak parakataha.
Ia songrango manderangni badi ka·anirangko man·ani ja·man Gram Sevak circle ge·antion, ma·mong sorkarini ra·gatgipa scheme-rangko name nirokna gita committee-rangko songna BJP tik ka·angaha ineba Tura-ni MDC parakataha.