SHILLONG: Meghalaya a·doko Cancer sabisiko man·giparang batroroengani gimin Cancer sabisiko warachakanio toromko dilenggipa manderang baksa kamrangko ka·rimna gita Budbar salo, NEIGRIHMS-ni Surgical Oncology department, dingtangmancha tom·aniko ong·atangaha.
Ia tom·aniko ong·atani bidingo NEIGRIHMS-ni Director Dr Nalin Mehta, jinmana talate on·angengon, Meghalaya a·dokko India a·songni Cancer capital ine mingsing minggamenga aro a·song gimiko mande jelbra jelsuaoni lak-prakon sak 131 ong·engani gimin ia kenbegnigipa sabisini bidingo manderangna mikrakataniko on·na nangchongmotengaha ine parakatenba, toromko dilgiparangan manderangna ia sabisini bidingo nambate u·iatna aro mikrakataniko on·na man·giparang ong·ani gimin ia kamo toromni dilgiparangkoba bakrimatna nangenga ine talataniko on·angaha.
Bi·sarangna aro dal·gimin manderangnaba ia cancer sabisini bidingo mikrakataniko on·na gita dingtang dingtang media channel-rangko aro pilak cholrangkon jakkalna nangenga ineba Dr Mehta aganaha.
Ia tom·anio Health & Family Welfare department-ni Secretary & Commissioner Sampath Kumar-ba jinmana aganprakengon, cancer sabisiko warachakanio toromni dilgiparangkoba bak ong·atenganina an·tangni mittelpilaniko parakatenba, ta·makku, chu aro guerangko jakkalani bidingo mikrakataniko on·china aro an·seng baljoke donganiko ranta ka·na gita manderangko didichina, toromni dilgiparangna ku·pattianiko on·angaha.
Ia tom·anio, Central Puja Committee, Shillong Muslim Union, Shillong Buddhist Association, Unitarian Church aro dingtang dingtang mondolini dilgiparangba bakko ra·angaha.
Ia tom·anio dongpae jinmana aganprakanggipa gipin manderangara, Surgical Oncology-ni Associate Professor Dr Caleb Harris, Shillong All Faith Forum-ni secretary Rev Fr Richard Majaw, Khasi Jaintia Christian Leaders Forum-ni secretary Rev Edwin Harris Kharkongor aro gipinrang ong·a.
M’laya-o toromko dilgiparang baksa Cancer-ko warachakna ja·ku de·a
Date:
Share post:
