Party, Reservation Policy-ni gimin jrip dongjaenga: Deborah Marak

SHILLONG: MLA Charles Pyngrope-ni Reservation Policy-ni bidingo agangipa kattani bidingo state Congress, mamingkon aganna jechake, Reservation Policy-ni bidingo chanchirimna special committee-ko songna tik ka·angaha.
MPCC working president Deborah Marak, ia mamlani gimin jajrenganiko parakatengon, party, pangnan manderangni namgnina aro bi·sarangni mikkangchi janggi tanganio namgniko ra·bana miksonge kam ka·a, ine aganataha.
“Ia mamlao Party-ni jrip dongengani gimin adita sing·anirang nakataha, indiba Party, ia mamlao jrip dongjaenga, a·bachengaonin ia mamlao party, adita changna tom·e chanchirimaniko dakenga, ine Marak, talatangaha aro ia mamlako name dake chanchirimna special Committee-ko songgen, committee-ni name dake sandie chanchirimaniko matchota ja·mansa, party, iani bidingo jinmana talate on·gen, ineba aganangkuaha.
Chanchirimanio Party-ni ja·manchakani giminba adita sing·anirangko man·soaha. Indiba chinga ia mamlao ka·sine chanchirimaniko dakna miksonga, maina chanchigija jekoba dakna tik ka·aniara darangnaba namgniko ra·baja, minggipina ia mamla ramram ong·ja, ian a·dokna aro chadamberangni mikkangchi janggi tanganio nangchakgipa ong·a, uni gimin ia mamlako chinga maming gualaniko dakna sikja, ine Marak aganaha.
Minggipin party MLA Charles Pyngrope-ni ia mamlao, ‘Reservation Policy-ko nipilna nanga’ ine agangipa kattara party-oni ong·ja, uni an·tangni chanchia kattasan ong·a, ine Marak, talataha.