TURA: Meghalaya a·dokko man·na skangonin Garo Hills-ni a·kawe jolrango songdongenggipa Muslim manderangba songdongkamgiparang ong·e Meghalaya a·dokko man·na krenganio jak on·paaha ine Anti-Corruption League (ACL) dol parakatenba, Garo Hills-ni a·kawe jolrango songdongenggipa Muslim manderangkoba ‘Other Backward Class’ gadango ra·gate, a·dokni Job Reservation Policy-o 4 percent-ko chamchina a·dokni Chief Minister Conrad K Sangma-ko didiataha.
ACL-ni general secretary Mostopha Kabir-ni parakatani gitade, Meghalaya a·dokko man·na skang, Garo Hills-ni a·kawe jolrango songdongenggipa Muslim-rang, Assam a·dokni bak ong·genchimoba aro Assamese-rangni daka rikaniko ja·rikgenchimoba, Captain Williamson Sangma aro gipin Tribal dilgiparangni ‘Meghalaya’ a·dokna krengdilanio, ia Muslim manderangba, Meghalaya a·dokon nambate janggi tangna man·pagen ine ka·dongani gnangsa dingtang a·dokna krenganio bak on·paahachim indiba Meghalaya a·dokko man·ani ja·man, Garo Hills-ni a·kawe jolrango songdongenggipa Muslim-rangna, kam ka·e cha·ani chol, lekka porani gita chol aro pilakni gitan cholrangko man·jae indita bilsirangna neng·nikanirangko chake janggi tangna nangtokengachim.
“Job Reservation Policy-na roster system-ko ra·gatani bidingo chanchirimdilna gita Minister Ampareen Lyngdoh-ni dilanichi Meghalaya sorkari, dingtangmancha committee-ko songe on·aha aro iano chingaba ka·dongani baksa Garo Hills-ni a·kawe jolrango songdongenggipa Muslim manderangnaba OBC gadangko on·e, reservation policy-o 4 percent-ko chamchina mol·molatenga,” ine ACL-ni general secretary parakataha.