SHILLONG: 1972 bilsini State Reservation Policy-ko gital dake nipiltaina gita expert committee-ko songchina dabianio Meghalaya a·dokni Congress dolba chakpaaniko parakataha.
Reservation roster committee-ni tom·a matchotani ja·man kobor ra·timgipa manderang baksa agangrikengon, a·dokni reservation policy-ara a·doko songdongenggipa chadamberangna namen nangchongmotgipa ong·ani gimin ia reservation policy-ko nipiltaichina dabianio Congress dolba chakpaaniko on·enga ine Budbar salo, Congress Legislature Party (CLP)-ni dilgipa Ronnie V Lyngdoh parakataha.
“Job reservation policy-ko gital dake nipiltaichina dabianio chingaba chu·gimik chakpaaniko on·enga. Reservation policy-ko nipiltaina gita sorkarina ku·pattianiko on·na expert committee-ko songna nangchongmota,” ine Lyngdoh aganaha.
Political dolrangna an·tangtangni chanchianirangko committee-na on·na gita antigni somoiko on·ahani gimin Congress dol kusi ong·a ineba Lyngdoh parakataha.
Lyngdoh-ni parakatani gitade, reservation policy-ko nipiltaiani bidingo MLA-rangsan an·tangtangni chanchianirangko aro nangnikanirangko committee-na on·na siengani gimin a·dokni Congress dol iani bidingo tom·e chanchirimna nangkuenga.
“Chinga party-ni gita tom·e chanchirimani ja·mansa chingni nangnikani aro chanchianirangkode jinmana parakna man·gen,” ine CLP-ni dilgipa parakataha.
Indake ong·engon, reservation policy-ni bidingo maming dakeba sikkele kamko ka·na man·jawa aro Congress dolni gitaba iani bidingo name chanchichengesa ja·kuko de·na nanggen ine Congress dolni sakgipin MLA Celestine Lyngdoh parakatskaaha.
“Reservation policy-ni bidingo chingni ja·ku de·anirang niam bidiko nangchakegipa ong·na nanggen aro niamko pe·gipa ong·na nangjawa. Uni gimin chinga chingni chanchianirangko committee-na on·na skangba chingni legal expert-rang baksa asonge agangrikchengna nanggen,” ine Lyngdoh aganaha.
Lyngdoh-ni parakatani gitade, expert committee-ko songchina agananiko ra·chakani ba jegalanide a·dok sorkarini jakosa ong·enga aro committee-de ku·pattianirangkosan on·na man·aigen.
Meghalaya a·doko songdongenggipa dingtang dingtang jatrangchi apsan nangrime 80 percent ong·atna nanga ine Gambegre-ni MLA Saleng Sangma-ni agangipani gimin sing·on, ua saksa Garo Hills-oni seokako man·gipa MLA ong·e an·tangni chanchianiko aganna bil donga ine Lyngdoh parakataha.