SHILLONG: Robibar salo, Meghalaya a·dok gimiko mande saksa COVID-19-ko man·dapaha aro ia mandeara Ri Bhoi a·jao ong·a.
Robibar salo mande saksa COVID-19 man·dapahani gimin da·o a·dok gimiko COVID man·e dongenggiparang sak 10 gapengaha aro ia sak 10-oni sak 5-de East Khasi Hills-o, sak 1-de Ri Bhoi a·jao, sak 3-de West Garo Hills-o aro sak 1-de West Jaintia Hills a·jao ong·enga.
Meghalaya a·doko COVID man·e dongenggipa sak 10-oni sak 2-kode hospital-rango donna nangenga.
Da·o dipet a·dok sorkari, manderangna niamrangko ra·gatna miksonganirang dongkuja indiba a·doko songdongenggipa mande sakantian, COVID-ni niamrangko ja·rikna nanga ine adita salrangna skangsan a·dokni Health Minister Ampareen Lyngdoh didiatahachim.
Ia sal somoirango manderang mask-rangko gantokjaengahani gimin jinmani biaprango ong·engon, mask-rangko ganjringchina aro saksa sakgipinoni chel·tanggrike dongchina gitaba Health Minister ku·pattiataha.