TURA: Tura-ni Parade Ground-o ong·atenggipa ‘Mina Bazar’ ba mela-o walantian gitrangko gam·e watengani a·sel sambao donggipa manderangna aro mongsongbate dingtang dingtang porikkarangko sena tarienggipa chatro chatrirangna neng·nikanirangko on·enga ine Tura-ni MDC Bernard N Marak parakatenba, ia ‘Mina Bazar’ ba mela-ko dontongatchina gita West Garo Hills a·jani Deputy Commissioner-ko didiataha.
Deputy Commissioner-na sedoatgipa chittio Marak-ni parakatani gitade, Tura-ni Parade Ground-o ‘Mina Bazar’-ko ong·atenggipa manderangara gipin biaprangoni re·bagipa manderangsa ong·e, GHADC-oniko trading licence-ko ra·chengna gitaba nangachim.
“Anga Tura-ni MDC ong·e iandakgipa mela-rangko ong·atna trade licence-rangko on·china recommend ka·aba dongkuja aro ia mela-ko ong·atenggipa manderang, nangchongmotgipa licence-rang donggijasa ong·atenga ine angna Tura-ni manderang badi ka·ahani giminsa iako seatna nangao ga·akenga,” ine Tura-ni MDC Bernard Marak parakataha.
Ia ‘Mina Bazar’-ko ong·atenggipa manderang trade licence-ko ra·ama ra·ja, uko sandichina Deputy Commissioner-ko u·iatengon, “Ia mela-ko ong·atenggipa manderang, GHADC-oniko trade licence-ko ra·chenggijasa ong·atenga ine angna u·iatahani gimin ian Sixth Schedule-ni ning·o dongimin niamrangko pe·ani gitaba ong·enga,” ine Marak parakataha.