SHILLONG: Chatro chatrirangko mikkangchina nambate tarisona man·na gita an·tangtangko namdapatchina Bristibar salo, a·dokni Education Minister Rakkam A Sangma, a·dokni skigiparangko didiataha.
National Education Policy (NEP) 2020-ni bidingo salgnina ong·atenggipa workshop-o jinmana aganprakangengon, NEP-ko chu·sokatna gita mikkangchi rakbegipa kamrangko chagrongna siengani gimin ia program-ara a·bachenganisan ong·enga aro NEP 2020-ko da·o dipet chu·sokatna man·kujaengoba a·gilsak gimikon iani nangchakeaniko nikna man·engaha ine Education Minister parakataha.
“An·ching an·chingni chatro chatrirangko name tarisona nangenga, uni gimin an·ching skigiparang ong·e an·tangtangkon namdapatchengna nangenga aro saksa sakgipinko didigrikna nanga. Chatro chatrirangna nambatgipa bida budiko on·na aro Meghalaya a·dokko salgro salaram jolo lekka pora on·chakram dakna gita an·ching skigiparang aro dilgiparang ong·e ra·bianirangko ka·donge mikkangpana nanga,” ine Sangma aganaha.
Mikkang chasongna nambatako on·na gita ia chasongon name tarisona nanga ineba ua aganaha.
“Bida budiko on·engon an·ching chu·ongnike dongaigiparang ong·jana indiba an·tangtangko bangbang ong·ate nambatako on·na krenge kamko ka·na,” ine Education Minister aganaha.
Sorkarini ra·gatgipa dingtang dingtang program-rangchi, chatro chatrirangna nambata bida budiko on·anio skigiparangni ku·pattiani aro bakrimanirangko man·na gitaba ua ka·dongchakenganiko parakangaha.
Ia workshop-ko ong·atanio Education department-ni Advisoe HM Shangpliang-ba jinmana aganprakangengon, National Education Policy-ara dingtanganiko ra·bana sienga ine an·tangni ka·dongchakenganiko parakataha.
“Chatro chatrirangna mikkangchi nambata salrangko ra·bana gita NEP 2020-ko nangchongmotenga,” ine ua aganaha.