SHILLONG: Batanggimin sal somoirango mikkarang wajae, Meghalaya a·dok gimikon chakna ampilgijani ding·aniko chakna nangahaoba Sukrobar pringo mikkarang wabae a·dokni manderangna rang·speaniko on·angaha.
A·doko da·o mikkarang wana a·bachengahani gimin Umiam dam-oba chi tang·dobagnok aro unode bijoliko namkale on·na man·gnok ineba sorkari ka·dongchakenganiko parakataha.
Iani bidingo kobor ra·timgipa manderang baksa agangrikengon, a·doko aro mongsongbate Shillong songjinmao mikkarang jimbee waahani gimin bijolini gitaba obostarang namkalnaba dongaha ine Sukrobar salo, a·dokni Power Minister AT Mondal parakataha.
Sukrobar salo, Meghalaya a·dokni skotong songjinmao mikka waani 71.0 mm ong·aha aro Umiam-oba mikka waani 63.2 mm ong·e Umiam Hydro Project-o da·o chirang adita tang·dobapilaha.
Batanggimin salrango Umiam dam-o chi tu·ani feet 3,162-san ong·aiahani gimin Umiam Hydro Project-ko chipna nangani cholrang donga ine kenchaksotokahachim indiba Sukrobar salo, mikkarang jimkale waangahani gimin da·o Umiam dam-o chi tu·ani feet 3,164.95-ona tang·dobapilaha.
“Mikkarang wana a·bachengahani gimin da·o obostarang namkalanggnok ine chinga ka·dongenga aro mikkarang waangkugenchimode a·dokni manderang bijoliko namkalbate man·gnok,” ine Mondal parakataha.
Umiam-na agreba a·dokni gipin bijoli bikotenggipa unit-rangba chirangko chu·onga gita nangenga ine janapatengon, Meghalaya a·doko Myntdu Leshka Hydro Power Project-onikon bang·bata bijolirangko man·engachim ine Power Minister parakataha.
Mikkarang waangkugenchimode chiring chibisikrangba dal·bagnok aro chirang chu·onga gita somoirangna donggnok, uni giminsa a·dokna mikka waaniko nangkuenga ineba ua aganaha.
Meghalaya a·doko mikkarang chu·onga gita wajaengani a·selan bijoliko bikotna man·jae a·dok gimikon konta 8-oni konta 10-mangona kingking load shedding-ko ba bijoliko kimitna nangao ga·akengachim ine nikna man·a.