TURA: Garo Hills-o damsa mikkim dongbatsranggipa Tura Super Market-o da·o pipe-rang leak ong·e aro a·arango chirang joksrue, manderang chaktopilgijagipa bibarangko chakna nangtokengaha.
Tura Super Market-ni basement ba ka·mabatsranggipa gadangona re·anggenchimode, uano pakmarangni sosie donganirangko, a·arango chirangchi joksrue donganiko aro paikanarangni bibarangko man·engani a·selan manderang dongtogijanirangko man·na nangtokengachim.
Re·anggipa 2022 bilsio, Tura-ni gitcham MP aro Lok Sabha-ni gitcham Speaker PA Sangma sagini bilsi 75 gapanio uni depante aro a·dokni Chief Minister Conrad K Sangma an·tangan Tura Super Market-ona re·ange nienba, ia building-ko gital dake taridaptaina ku·rachakangahachim. Uni ku·rachakanga gitan kamrangkoba ka·bebeahachim indiba official-rangni u·iatani gitade, kamko ka·gipa contractor-rang sikkele kamrangko ka·ahani a·sel aro kamrangko name ka·jahani a·sel ia building bang·bata bakon chirangni joksrue donganiko nikna man·kuengachim.
Indake ong·engon, adita salrangna skang, songsalna kamko ka·enggipa manderangoni saksa Jaynie N Sangma, ia biapona re·angenba ia biapo ong·enggipa obostarangko nikbae an·tangni suk ong·gijaniko parakataha.
“Tura Super Market-ona salantian TMB-ni official-rang re·angrongengachim aro uamang obostarangkoba nikengachim indiba da·alonan obostarangko namdapatna gita maming ja·kurangko de·jaenga. Ia Super Market-o dokkanrangko dake cha·enggipa manderangni namgnina ia market-ko ta·raken namdapatna nangchongmota,” ine Sangma parakataha.
Iani bidingo Tura Municipal Board (TMB)-ni Chief Executive Officer (CEO) Rikse R Marak-o sing·sandiatskaon, kamrangko name ka·jahani gimin contractor-rangko matnangatskaaha.
“TMB-o kam ka·giparang chu·ongjae nanga gita nirok sandianirangko dakna man·jaenga indiba chinga man·a dipetde nirok sandina jotton ka·enga. Tura Super Market-ko taridapengahachim indiba contractor-rang nalani pipe-rangko tarijahani a·selsa iandakgipa obostarang ong·enga,” ine Marak parakataha.
Tura Super Market sambengo donggipa nalarango manderang skatang jabolrangko galengani a·sel nalarang block ong·e moila baksa chirang market ning·china joksruangenga ineba TMB-ni CEO talataniko on·angaha.
Tura Super Market-ko namdapatanirang dongjaengani gimin All India Trinamool Congress (AITC)-ni chadamberangko dilgipa Richard Marak-ba suk ong·gijaniko parakataha.