Shillong: Meghalayani manderangna ILP-ko on·genma on·jawa, uko Ma·mong aro A·dok Sorkari srangsrang agansrangna nanga ine KSU Sonibaro dabie aganaha.
“Meghalaya-ni manderangna ILP-ko on·genma on·jawa uko Ma·mong aro A·dok Sorkarini srange aganchakaniko chingna nanga” ine KSU president, Lambostarwell Marngar, mijal Shillongo Central Executive Committee (CEC)-na gital memborrangko seokani tom·anio aganaha.
KSU, ia mamlani bidingo ru·utbeen chakchike sengengaha ine aganengon, A·doko ILP-ko ra·gatna gita Ma·mong Sorkariko didina ine re·anggipa 2019 bilsion Meghalaya Assembly-o resolution-koba ra·gatpilahachim ine KSU dilgipa aganaha.
“Ra·gatgimin resolution mai ong·chipjok chinga u·ija. Political master-rango angni sing·anide ian, uamangara ia mamlani bidingo Ma·mongko ja·kol sanengama,” Marngar aganaha.
Uni aganani gitade, ILP-na dabienggipani bidingo Ma·mong ba a·dok sorkarionikoba maming koborkoba knaan dongjaengachim.
Ia mamlani bidingo indakpilede chakchike sengdame rojawaha ineba ua agandapaha.
“Angni Sorkario mol·molanide ian ong·gen, ia mamlani bidingo dilsretna jotton ka·na nangja, chadamberangni gisepo ka·o nangani ong·katjokon dakgrik dinggrikaniona soka,” KSU president aganaha.
“Aganmangmangaiakode KSU bebera·ja, maina kattarangna bate kaman bilakbata,” Marngar aganaha.
Mingsa employment policy-koba tarina gita Sorkari mikrakna nangengaha ineba KSU dilgipa aganaha.
