TURA: West Garo Hills a·jani Executive Magistrate aro Rongram Block Development Officer (BDO)-ni u·iataniko man·soani ja·man, GHADC-ni ning·o donggipa dingtang dingtang bazaar antirango, skatang jabolrangko chiring chibisikrango galjachina gita Garo Hills Autonomous District Council (GHADC)-ni Secretary mikrakataniko on·ataha.
Iani bidingo dingtang dingtang bazaar/haat committee-ni president aro secretary-rangna u·iataniko on·angengon, bazaar antirangko jokpakenggipa chiring chibimarango, ma·manti jabolrang, jekai plastic, me·su samjakrang, cha ba mi dokkanni jabolrang, ba·ra suri, tin kenta, matchu, wak aro do·o sigiminrangko galjachina gita GHADC-ni Secretary mikrakataniko on·ataha.
Ia ge·etaniko manijagenchimode, dongimin niamrango pangchake, bazaar/haat committee-ni kosako rakgipa ja·kurangko de·anggen ine GHADC-ni Secretary parakataha.