WILLIAMNAGAR: Budbar salo, Tura-ni MP Agatha K Sangma, District Development Coordination & Monitoring Committee (DISHA)-ni tom·aniko Williamnagar-o ong·atangenba, East Garo Hills a·jao ra·gate ka·enggipa ma·mongni dingtang dingtang scheme-rangko nipilangaha.
Ia tom·anio a·dokni PHE Minister aro jolni MLA Marcuise N Marak baksana East Garo Hills a·jani Deputy Commissioner Vibhor Aggarwal aro dingtang dingtang department-ni officer-rangba bakko ra·angtokaha.
Ia tom·anio Pradhan Mantri Awas Yojana-Gramin (PMAY-G) scheme-ko nipilangengon, ia scheme-ko man·enggipa mitam manderang, joltangtangni ramarangko tarina gita tangka paisarangko on·gilna skaniko paraktokenga ine joltangni MLA Marcuis Marak janapatenba, ia tangkarangara ramarangko tarina miksonge chamgipa tangka paisarang ong·jani gimin ramarangko tarina gitade jakkalna man·jawa ine ia scheme-ni bidingo manderangna agan-talate on·china a·jani Block Development Officer-rangko ge·etangaha.
Pradhan Mantri Gram Sadak Yojana (PMGSY)-ni kamrangko nipilangengon, East Garo Hills a·jao kilometre 234.911 ong·gipa dil 67 ramarangko tarina ia scheme-ni ning·o tangka paisarangko chamataha aro ianoni dil 40 ramarangkode matchotmanaha ine officer-rang parakataha. PMGSY-ni kamrangko name ka·jaenggipa aro somoi gita matchotjaenggipa contractor-rangni kosako rakgipa ja·kurangko de·china gita Tura-ni MP, ge·etaniko on·angskaaha.
Ia tom·anio PHE-ni Jal Jeevan Mission aro Swachh Bharat Mission, Health & Family Welfare department-ni Meghalaya Health Sector Strengthening Project (MHSSP) aro Pradhan Mantri Bharatiya Jan Aushadhi Pariyojana (PM-BHIM), Integrated Child Development Service (ICDS)-ni Poshan Abhiyan, Soil & Water Conservation department-ni Pradhan Mantri Krishi Sinchai Yojana aro uandakgipa dingtang dingtang department-ni scheme-rangkoba Tura-ni MP niangaha.