TURA: Manderangni nangchongmotgipa bosturang dam rakbatroroengani a·sel kangal cholgrirang neng·nikanirangko chagrongna nangtokengani gimin Trinamool Congress (TMC)-ni chadambe dolko dilgipa Richard Marak, suk ong·gijaniko parakatenba, iako ta·raken nirokatchina gita sorkariko didiataha.
“Manderangni nangchongmotgipa bosturang, jekai petrol, diesel, me·su samjak aro dingtang dingtang bostuni damrang rakbatengahani gimin ramram manderang janggi tanganio neng·nikanirangko chagrongna nangtokenga. Manderangni nangchongmotgipa bosturangni damko sorkari nirokna gisiko nangjaengani a·sel kangal cholgrirangde namen neng·nikanirangko chagrongna nangtokengaha,” ine Marak parakataha.
Marak-ni parakatani gitade, batanggimin ja 15-ni gisepo a·gilsak gimikon toni dam 50 percent tang·onange, May-ni 22 tariko barrel-prako dollar 139-oni da·o dollar 69 aro dollar 73-ona komiangahachim indiba India a·songode da·onan petrol aro diesel-ni damrang komiskakujaengachim.
Iani bidingo ma·mong sorkariko sing·doatengon, a·gilsak gimikon petrol aro diesel-ni damrang tang·onangahaoba maini gimin India a·songode iandakgipa toni damrang komikujaenga ine TMC-ni dilgipa sing·doataha.
Ma·manti bosturangni damrangko sorkari name tik ka·e on·na nanga ine janapatengon, a·songo songdongenggipa manderang neng·nikanirangko man·jana gita bosturangko damko sorkari nirokjringe komiatna nanga ine Marak dabiangaha.