SHILLONG: Meghalaya a·doko nangchongmotgipa kamrangna ku·rangko on·na gita opposition dol ong·e dongenggipa Congress, Trinamool Congress (TMC) aro Voice of the People’s Party (VPP)-ni gisepo meli-nangrimani dongjaenga ine matnanganiko Leader of Opposition (LO) ba Opposition dolni dilgipa aro Congress dolni dilgipa Ronnie V Lyngdoh raken jegalatskaaha.
Da·o dipet Assembly-o Congress, TMC aro VPP dolrang opposition dol ong·e asongengachim indiba adita salrangna skangsan Congress dolni dilgipa Ronnie V Lyngdoh-ko Assembly-ni Speaker Thomas A Sangma, opposition dolko dilna gita seokangskaahachim ine nikna man·a.
Iani bidingo talataniko on·angengon, “Chinga dolgittaman dingtang dingtang miksongani aro bebera·ani gnangsa election-o chegipa ong·aha aro chinga dolgittamni gisepon election-na skang aro election-ni ja·manba nangrime kam ka·ani dongjani giminsa da·oba doltangtang ong·e dongenga. Indake ong·genchimoba, chinga dolgittamni gisepo meli-nangrimani dongja ine agananide gualani ong·enga,” ine Lyngdoh parakataha.
Dolgittam opposition dolrangni gisepo bakrimani dongjagenchimoba a·dokni aro a·doko songdongenggipa manderangni nanganirangnade pangnan apsan ku·rangko on·aigen aro saoba maiba kamni gimin ku·rangko on·genchimode pangnan gimikan iako ra·chakgrikaigen ineba Opposition dolni dilgipa parakataha.
“Opposition dolrangko bilgrienga ine agananiko anga an·tangde ma·sijaenga. Da·alo ma·mong sorkari Uniform Civil Code (UCC)-ko ra·gatna jotton ka·engon, opposition dolrangoni darangba iako ra·chakjaenga aro kakketko agangenchimode UCC-ko NPP-ba jegalenga,” ine Lyngdoh aganaha.