SHILLONG: India a·songo Uniform Civil Code (UCC)-ko ra·gatna miksongenggipani bidingo name chanchichengchina gita Khasi Students Union (KSU), ma·mong sorkariko didiatenba, iako manigija ra·gatdrana jotton ka·genchimode Citizenship Amendment Bill (CAB)-ko ra·gatani somoio gitan apsan daken jingjengatanirangko nikna nangnaba gnang ine mikrakataniko on·angaha.
A·songo UCC-ko ra·gatna miksongengani gimin ma·mong sorkarini kosako jegalatengon, salgro salaram a·dokrango songdongenggipa dingtang dingtang Tribal jatrangni daka rikani aro ja·rikenggipa bewalrango nangatena gita nangja ine KSU-ni general secretary Donald V Thabah parakataha.
“Meghalaya a·dokni tribal-rangba gam-jinrangko man·rikani, nokdang chalaiani, jikse galgrikani, songsalni niamrang aro bia ka·anirango an·tangtangni dakbewal rikbewal niam retirang donga aro Meghalaya a·doko songdongenggipa bang·bata tribal-rangan Kristian toromko ja·rikgiparang ong·e Christian Marriage Act-kosa ja·rikgiparang ong·a. UCC-ko ra·gataniara chingni dingtangbegipa daka rikanirangna nangchakeaniko ra·bagnok,” ine Thabah parakataha.
Mizoram aro Nagaland a·dokrangode Article 371G aro Article 371A niamrang donge chel·chakanirangko man·paengoba Meghalaya a·dokode iandakgipa niamrangko ja·rikpagipa ong·jae chel·chakaniko man·pajawa ineba KSU-ni general secretary parakataha.
“Iandakgipa niamrang dongani gimin ia damgni a·dokrangode ma·mongni niamrang nangchakeani dongjawa,” ine Thabah talataniko on·angaha.
Goa a·dokode a·doktangni civil code donga ine talataniko on·angskaengon a·songo songdongenggipa pilak manderangna ma·mongni civil code-rangko ra·gatani pal, a·doktangtangon an·tangtangni civil code-rangko ra·gatchina ma·mong sorkari ge·etaniko on·on nambatgen ine KSU parakataha.
A·doktangtango civil code-ko ra·gatchina ge·etgenchimode civil code-ko ra·gatama ra·gatjawa a·doktangtangan tik ka·na man·genchim ineba Thabah aganaha.