SHILLONG: SSA skulrango skigiparang, re·anggipa April jaoni June jaona jagittamni dormaharangko man·tokkujaengon, skigiparangna April aro May jagnini dormahakode ia July jani gnigipa antion watatgnok ine Mongolbar salo, a·dokni Education Minister Rakkam A Sangma, Meghalaya SSA Schools Association (MSSASA)-na parakataha.
MSSASA-ni president Aristotle C Rymbai-ni parakatani gitade, SSA skulrango skigiparangna April aro May jani dormaharangko da·o July jani gnigipa antion on·enba, June jani dormahakode ja·mano on·atskagen ine Education Minister ku·rachakaniko on·ataha.
SSA skulrango skigiparangna 2016-2017 PAB-ni arrear-rangko on·na man·na gita State Finance department, gong kror 12.44 tangkarangko Education department-na watatmanaha ineba Education Minister MSSASA-na u·iataha ine Rymbai parakataha.
“2016-17 bilsini arrear-rangko on·na gita gong kror 12.44 tangkarangko skanggipa instalment dake finance department watatmanaha ine chingna Mongolbar salo, Education Minister Rakkam Sangma u·iataha,” ine MSSASA-ni president Aristotle C Rymbai parakataha.
MSSASA president-ni parakatani gitade, SSA skigiparangna arrear-rangko gamna gita a·jatangtangonan sanction order-rangko watatenba, SSA skigiparangni personal account-ona transfer ka·china ge·etaniko on·ataha ineba Education Minister u·iataha.
SSA skulrango skigiparangna re·anggipa April jaoni June jaona jagittamni dormaharangko on·kujaengani a·sel skigiparang neng·nikanirangko chagrongna nangtokengaha ine adita salrangna skangsan, All Garo Hills SSA School Teachers Association (AGHSSASTA) parakatenba, skigiparangni man·na nangkuenggipa dormaharangko ta·raken on·china gita a·dokni Chief Minister Conrad K Sangma aro Education Minister Rakkam A Sangma-ko didiatahachim ine nikna man·a.