U·IATTIMGIPAONI
SHILLONG: East Jaintia Hills a·jao skigiparangna Deputy Commissioner-ni Uniattendance (UBI) app-ko jakkalna miksongenganiko All Meghalaya Primary School Teachers Association (AMPSTA) raken jegalataha.
AMPSTA-ni general secretary FC Shullai-ni kobor ra·timgiparangna parakatani gitade, East Jaintia Hills a·jani skulrango skigiparang bang·batan kamtangtangchi re·jaenga ine dingtang dingtang songni dilgiparang badi ka·doangani ja·man, East Jaintia Hills a·jao skigiparangna UBI app-ko jakkalna gita Deputy Commissioner tik ka·aha ine ua koborko man·soahachim.
Meghalaya a·doko rokomgni skulrang, chong·motan sorkarichi chu·gimik chalaigipa skulrang aro toromni gita ba jolni gita chalaigipa skulrangba donga ine janapatengon, torom ba joltangtangchi chalaienggipa skulrangni giminde Education department, skulko chalaienggipa managing committee-rang baksasa agangrikchengna nanga ine AMPSTA-ni general secretary parakataha.
“Ia skulrangko managing committee-rangsa chu·gimik bil man·e chalaienga ine an·ching ma·sina nanga. East Jaintia Hills a·jao UBI app-ko jakkalna ge·etaniko official-rangonisa on·aha indiba Education department-onide on·jaha,” ine Shullai parakataha.
Mitam sorkari skulrangoba Rangbah Shnong ba songni dilgiparangsa managing committee-ni president ong·enga ine janapatengon, iandake skigiparangni attendance-ko ra·na UBI app-ko jakkalna gita official-rangni ge·etaniko on·aniara managing committee-ni bilrangko ra·sekani gitaba ong·skaenga ine AMPSTA parakataha.
School managing committee-ni kosako maikai deputy commissioner bilko jakkalna man·a ine sing·doatengon, skigiparangni skulrangchi re·jana managing committee-rangna badi ka·anirang dongama dongja ukosa ua ma·sina sikenga ine Shullai parakataha.
Skigiparang skulrangchi re·ama re·jaenga uko Education department, nangchakegipa managing committee-rangonikosa sing·sandina nangachim ineba ua parakataha.
“Skigiparang skulrangchi re·jaenga ine badi ka·anirangko man·genchimosa managing committee-rang, ua skigipana show cause notice-ko on·na nanga indiba iandakgipa ja·kuko de·aniara namen ra·chakna man·gijani ong·a,” ineba Shullai parakataha.
Indake ong·engon, skigiparang classroom-ona napango aro class ra·a matchote classroom-oni ong·katangengmiting somoio photo ka·china ge·etaniara skigiparangna boja gatdapani gitasa ong·enga ineba AMPSTA-ni dilgipa, suk ong·gijaniko parakataha.
Shullai-ni parakatani gitade, skigipani kamara bi·sarangna skiani kamsan ong·aigija, mid-day meal program-rangko nirokani, report card-rangko tariani aro skulni gipin kamrangko ka·ani daitorangba donga indiba iandake classroom-o napa changanti aro ong·katpila changanti photo ka·china ge·etaniara skigiparangna neng·nikanirangko on·dapani gitasa ong·enga.
Skigiparangni attendance-ko ra·na gita UBI app-ko jakkalani bidingo Education department-onisa ge·etaniko on·na nanga aro deputy commissioner-rangde iandakgipa ge·etanirangko on·na man·ja ineba ua parakataha.