U·IATTIMGIPAONI
TURA: Manipur a·doko songdongenggipa dingtang dingtang jatrangni gisepo so·sojengjeng ong·enganichi bang·a manderangan so·otanirangko man·engahani gimin aro bang·a nokdangrangan nokgri jamgri ong·atako man·na nangengahani gimin adita salrangna skang, Tura Diocese-ni ning·o donggipa Garo Hills Catholic Union (GHCU)-ni Executive Committee, South Garo Hills a·jani Dumnikura Parish Compound-o tom·e chanchirimangenba, Manipur a·doko ta·raken tom·tomaniko ra·bapilchina gita ma·mong sorkariko didiataha.
Manipur a·doko so·sojengjeng ong·anirangko namatna gita ja·kurangko de·jaengani gimin ma·mong sorkarini kamo suk ong·gijaniko parakatengon, Manipur a·doko so·sojengjeng ong·enganichi lakni lak manderang nokgri jamgri ong·na nangtokengaha, bang·a gilja nokrangkon so·e galaha aro bang·a manderangan so·otako man·tokaha ine GHCU parakatenba, iani bidingo ta·raken ja·kuko de·china ma·mong sorkariko didiataha.
“Ia tom·anio GHCU-ni dilgiparang apsan chanchirimangenba, Manipur a·doko ong·enggipa obostarangna suk ong·gijaniko paraktokaha aro iani bidingo a·songni Prime Minister-na chittiko sedoate, ia apsan chittini copy-ko Union Home Minister aro Meghalaya a·dokni Chief Minister-naba on·atna gita chinga tik ka·angaha,” ine GHCU-ni secretary Raphael G Momin parakataha.