TURA: ACHIK aro dingtang dingtang NGO-rangni winter capital aro backlog-na okumu chake dabiengmitingo, ra·chakna man·gija kattarangko aganani gimin Garo Hills-ni manderangni ding·e dongsotokanina, health minister, Ampareen Lyngdoh, uni salgittamna Garo Hills-ona wenanganiko dontongataha, aro North Garo Hills, Resubelparaonin Shillong-ona an·pilangaiaha.
Health Minister, komibeoba Garo Hills-ni district damgittamni, chong·motan North, West aro South Garo Hills district-rangona re·angenba sana banani centre aro obostarangko nirokna gita re·angna miksongani dongachim indiba jegalgipa dolrang Turao jinma tom·daksoenga ingipa koborko man·e Shillong-ona pil·angpilaha.
Mnisal attamo Ampareen, Tura Circuit House-o waltugen ine chanchisoenba, jegalgipa dolrang Turani Tetengkol rama bibrao sengsotokahachim. Indake ACHIK-ni winter capital-na dabianio health minister-ni ku·watgipa kattako ra·chakna man·jaenba, uni kosako ka·o nangeming, uni re·angao jegalsona gita jegalgipa dolrang tom·dake sengsotokahachim.
Unomitingo winter capital aro backlog-na dabie ACHIK-ni okumu chakani mijalo sal 11 ga·dapaha, aro dontongani katta da·o dipet mamingba dongkuja. Okumu chake jingjengatgiparang CM, Conrad Sangma-ni uamangko re·bae grongeani dabienga, jeon Garo Garo Hills-ni political dilgiparang, da·odipet darangba uamangko grongegipa dongkuja aro chakchike dongtokenga. Da·o dipet Tura MDC, Bernard Marak mangmangsan, grongenba uamangna chakpaaniko parakeahachim.
