SHILLONG: Meghalaya a·doko bang·a college-rangan gital National Education Policy (NEP) 2020-ko ra·gatna gita taritokkujaengani a·sel jajaanirang ong·tokengon, ia gital NEP-ko a·dokoba ra·gatana agreed gipin cholrang dongjawaha ine a·dokni Chief Minister Conrad K Sangma talataniko on·angaha.
Chief Minister-ni parakatani gitade, NEP 2020-ko ra·gatna nangengoba sorkari, an·tangni skani gita dakdranade man·jawa aro NEP-ko ra·gatani bidingo a·dokni manderang, skigiparang aro dingtang dingtang college-rang baksa chanchirimchengna nanggen.
NEP 2020-ko ra·gatanio kam ka·giparangko nangdapan baksana nokrangkoba nangdapengani a·sel bang·en neng·nikanirangde donggen ine janapatengon, pilak kamrangon dingtangataniode ra·bianirang dongaigen ine Chief Minister parakatskaaha.
A·dokni pilak sorkari college-rangon NEP-ko ra·gatna gita sorkari pilak nanga dakchakanirangko on·gen ineba Chief Minister parakataha.
Management committee-rangchi aro dingtang dingtang dolrangni dakchakanirangchi chalaienggipa deficit aro adhoc college-rangni gimin janapatskaengon, iandakgipa college-rangna sorkari maikai dakchakanirangko on·na man·gen, ua cholrangko sorkari nigen ine Sangma parakataha.
“NEP-ko ra·gatanio neng·nikanirangko chagrongna sienggipa college-rang bang·en donggen aro chinga uamang pilakanade dakchakanirangko on·na man·gen ine aganna man·jawa. Iako chu·sokgipa ong·atna gitade management committee-rang, tangka paisarangko dakchake on·enggipa pilakan sorkari baksa apsan kamko ka·na nanggen,” ine ua aganaha.
NEP 2020-ni bidingo pilak college-rangan ja·kuko de·chakatna nanggen aro iani bidingo Education department, NEHU baksana che·em che·em chanchirimgen ine janapatengon, a·doko darangba NEP-ko jegalengade ong·ja aro ia gital NEP-ko ra·gatanio dingtang dingtang ra·bianirang dongengoba ian chatro chatrirangni namgninasa ong·enga ine Chief Minister talataniko on·angaha.
A·dokni Education Minister Rakkam A Sangma-ni parakatani gitade, re·baenggipa August-ni 10 ba 11 tariko State Higher Education Council, NEHU-ni Vice Chancellor Prabha Shankar Shukla aro dingtang dingtang college-ni dilgiparang baksa ia gital NEP-ni bidingo tom·e agan-talatanirangko on·na siengachim.