TURA: Ramarangko tarina gita chame on·gipa tangka paisarangko oke ra·ani ja·manba ia ramarangko tarigija donchipaha ine dolgni self help group (SHG)-rang, chong·motan Tura Walbakgre-oni Akusa SHG aro Ampati Kebolpara-oni Chinasa SHG-ni kosako South West Garo Hills a·jani AAYF aro AYWO dolrang matnangenba, Mahendraganj Police Station-o FIR ka·doangaha.
Dolgni NGO-rangni parakatani gitade, Durapara songo gari re·na man·gipa ramako tarina gong 9,98,000-ko aro Bakdagre songoba gari re·na man·gipa ramako tarina gong 9,99,000 tangkarangko chamahachim. Ia ramarangko tarina gita chamgipa gong 19,97,000 tangkarangko Tura Walbakgre-oni Akusa SHG-ni secretary, Zikzak C&RD Block-ni CMSDF-oniko okaba okahachim aro report-oba ramako taria matchotaha ine mesokahachim indiba ua biapona re·ange niode rama tariako nikna man·skajaha ine AAYF aro AYWO matnangataha.
Apsan daken, Debajani songo gari re·na man·gipa ramako tarina gong 9,99,300-ko, Sanjengpara-oba gari re·na man·gipa ramako tarina gong 9,99,300-ko aro Aruakgre songoba gari re·na man·gipa ramako tarina gong 9,99,600 tangkarangko chamatahachim ine dolgni NGO-rang parakatenba, ia ramarangko tarina chamgipa tangkarangoni gong 29,98,200 tangkarangko Ampati Kebolpara-oni Chinasa SHG-ni secretary, Zikzak C&RD Block-ni CMSDF-oniko okahachim indiba ramarangko tarigija donchipaiaha ine matnangataha.
Ia dolgni SHG-rang, songni namgnina chamgipa gong 49,96,100 tangkarangko oke ra·aha ine matnangatengon, iani bidingo inquiry-ko dakenba, ia dolgni SHG-rangni kosako nanga gita ja·kurangko de·china gita South West Garo Hills a·jani AAYF aro AYWO dolrang, Mahendranganj Police Station-ni officer-in-charge-ko didiataha.