U·IATTIMGIPAONI
SHILLONG: National Education Policy (NEP) 2020-ko ra·gatanio chagrongna nangenggipa dingtang dingtang ra·bianirangko namatna man·na gita a·doko songdongenggipa pilak manderangko aro dingtang dingtang dolrangkoba jak on·pachina gita Opposition dolni dilgipa Ronnie V Lyngdoh didiataha.
“NEP-ko ra·gatanio chagrongna nangenggipa dingtang dingtang ra·bianirangko namatna gita an·ching a·dokko dilenggiparang, university ba college-ni skigiparang, chatro chatrirang pilakan ku·cholsan ong·e jakko on·pana nangenga,” ine Lyngdoh parakataha.
NEP 2020-ko ra·gatanichi chatro chatrirang neng·nikanirangko chagrongna nangjana gita nambatgipa ja·kuko de·e ia neng·nikanirangko namatna nanga ineba ua aganaha.
Da·o NEP-ko ra·gatenba, ja·mano neng·nikanirangko chagrongna nanggenchimode maming namgnirang dongjawa ineba Lyngdoh aganaha.
“NEP-ko ra·gatna skangba an·ching iani bidingo che·em che·em chanchirimchengna nangenga. NEP-ko an·chingna nangja ong·ja indiba Meghalaya College Teachers Association-ni nanganirangkoba an·ching nina gita nangenga. NEP-ko ra·gatna skang an·ching chu·onga gita nokrang aro kam ka·giparangba dongchengna nanggen,” ine Opposition dolni dilgipa parakataha.
NEP-ko ra·gatna nangaiani gimin ra·gatanichide maming namgnirangko man·jawa ineba ua aganaha.
“A·dokni college-rang NEP-ko ra·gatna taritokahama aro chu·onga gita kam ka·giparang dongama ukoba an·ching name nichengna nanggen. NEP 2020-ko ra·gatanichi chatro chatrirangan namgniko man·jagenchimode ia niamko ra·gatani maming namgni dongjawaha,” ine Lyngdoh aganaha.