U·IATTIMGIPAONI
TURA: Songni namgnina chamatgipa tangka paisarangko jakkalsreta ine job card holder-rangni matnanganiko West Garo Hills a·jao donggipa Haripur VEC-ni president aro secretary jegalatenba, badiaba dolni manderangsa an·tangtangni man·gnina uamangni kosako badi ka·china gita job card holder-rangko didiaha ine parakataha.
Haripur VEC-ni president Abdul Bashid Sarkar aro secretary Lal Bahadur Islam-ni parakatani gitade, MGNREGS-ni baditaba lak tangkarangko jakkalsreta ine matnanganiara kakket ong·ja maina job card holder-rangni tangkarangko uamang sakprakprakni bank account-rangosa chipatahani gimin iano tangka jakkalsretani kattaan dongjachim.
Uamang an·tangtangari VEC-ni president aro secretary-ni kamko jako ra·a ong·ja ine talataniko on·angskaengon, uamangko job card holder-rangsa niam gita VEC-ni president aro secretary-na seokaha ine VEC-ni dilgiparang parakataha.
Uamangni kosako badiaba manderangni a·selsa VEC-ni bang·gija manderangsan matnangtokenga indiba VEC-ni bang·bata manderangan uamangna chakpaaniko on·enga ineba VEC-ni president aro secretary parakataha.