U·IATTIMGIPAONI
SHILLONG: Khasi aro Jaintia Hills Autonomous District Council (KHADC aro JHADC) election-ko re·baenggipa 2024 bilsio ong·atna siengahani gimin Voice of the People’s Party (VPP)-ni tikito susana gita dorgasto galgipa candidate-rangko party-ni State Election Committee (SEC) basena a·bachengatgnok ine u·iataha.
“VPP-na dorgasto galgipa manderangkosan chinga candidate-na seokanggen,” ine VPP-ni dilgiparang parakataha.
Re·baenggipa 2024 bilsini KHADC aro JHADC election damgnion VPP susana gita tik ka·ahachim ine nikna man·a.
Ia 2023 bilsini Meghalaya Legislative Assembly election-oba bikotdaldalgipa VPP, seat dambriko chena man·ahani gimin re·baenggipa 2024 bilsio ong·atna sienggipa Lok Sabha aro district council, chong·motan KHADC & JHADC election-rangoba chu·sokgipa ong·na ka·dongenga ine adita salrangna skangsan VPP-ni dilgiparang parakatahachim.
Indake ong·engon, MLA scheme-rangko pangnan maming dongnuani gri chu·sokatchina aro kamni report-rangko pangnan jinmana mesokatjringchina gitaba VPP-ni sakbri MLA-rangko party-ni dilgiparang didiataha.
Iani bidingo VPP-ni MLA sakbrina chittiko seatengon, adita salrangna skang, VPP-ni SEC tom·enba, MLA-rangni gisepo maming dongnuani gri kamrangko ka·na nangani gimin chanchiangaha ine VPP-ni general secretary Ricky AJ Syngkon parakataha.