U·IATTIMGIPAONI
SHILLONG: National Education Policy (NEP) 2020-ko ra·gatanio Meghalaya College Teachers Association (MCTA) aro North Eastern Hill University (NEHU)-ni Vice Chancellor-ni gisepo meligrikna man·kujaengon, a·doko NEP-ko niam gri ra·gataniode MCTA maming dakeba bakrimaniko on·na man·jawa ine talataniko on·angtaiaha.
NEP-ni bidingo an·tangtangni chanchianiko dingtangatchina NEHU-ni VC PS Shukla-ni mol·molaniko uamang ma·sichakenga ine janapatengon, NEP-ni bidingo uamangni jegalaniara pangchakani gri ong·ja aro nangchongmotanian ong·enga ine MCTA parakatskaaha.
“College-rango NEP-ko niam gri ra·gatanikode chinga ra·chakna man·chongmotjawa aro iako ma·sina nangchongmota. Lekka porani kamrangna an·ching namen simsakbena nanga aro maming tarisamsoani gri NEP-ko da·o sikkele ra·gatgenchimode ja·mano chatro chatrirangnasa namjanaba gnang. Chinga namgipa lekka poraniko on·na miksonganiosa iako dakenga,” ine MCTA-ni general secretary Airpeace W Rani parakataha.
NEP-ko ra·gatchina gita college-rangna u·iataniko ra·pilchinaba MCTA, NEHU-ni VC-ko didiataha.
MCTA-ni dilgiparangko NEHU VC-ni agangrikna okamenggipani gimin aganchakaniko on·angskaengon, “Chinga NEHU-ni VC baksa agangrikna bi·a dongja aro chingni gisepo agangrikanirangko a·bachengatgenchimoba chingni dabianirangde dingtangjawaha. Da·o chingni suk ong·jaenganide, NEP-ko sikkele ra·gatani a·sel first semester-o poraienggipa chatro chatrirangsa neng·nikanirangko man·skana nangenga,” ine Rani parakataha.
Skigiparang baksa tom·anirangko ong·ate roana bate NEHU-ni VC, Academic Council-ni tom·anikosa ong·atna nanga ineba MCTA-ni general secretary parakataha.
“NEP-ni nanganirangni gimin chanchirimna gitade Academic Council-sa nambatgipa gadang ong·gen,” ine ua aganaha.
NEP-ni bidingo dingtang dingtang dolrang baksa agangrikanichiba maiba namgnirangkode man·naba gnang ine janapatengon, bon·kamaode NEP-ni bidingo Academic Council-sa tik ka·na bil donga ine Rani parakataha.