U·IATTIMGIPAONI SHILLONG: Khasi Hills Autonomous District Council (KHADC) aro Jaintia Hills Autonomous District Council (JHADC) election-rang ong·nasiengon, election-rango susana gita da·omiting Khasi Jaintia Hills-o niksengbaenggipa Voice of the People’s Party (VPP) tikitna dorgasto galgiparang gapchipilengaha. Re·anggipa Assembly election-o ge·bri seat-rangko cheani ja·mano, VPP da·o KHADC aro JHADC election-rangna mikpakma nienga, jean ru·utgija somoirangni gisepon ong·gnok. “Tikitna dorgasto galgiparangoniko party candidate-na seokna gita kamrangko ka·engaha. Chingni party-ni gita susana, chingni party tikitna galgiparang namen bang·aha” ine VPP general secretary Dr Ricky AJ Syngkon aganaha. Tikitna galgiparang bang·ode candidate-rangko seokanio neng·nikanirang dongjawama ine sing·on, candidate-rangko seokani bewal chingo donga, indakpile neng·nikanirangkode chagrongjawa ine anga chanchia. Chinga party-ni seokani bewalko ja·rikgen, Syngkon aganaha. District council poll-rango seat-rangko bang·e chena gitaba ching ka·dongenga, ua aganaha. Unaskang, da·omiting a·doko donggipa regional party-rangko tang·attokenba uamangni biaprangko uamang ra·skagnok ineba VPP, a·kange aganahachim. Unomitingo, a·doko sason ka·enggipa National People’s Party (NPP) baksa bakrimgipa regional party-rangko ga·pakgaltokchina gita VPP president Ardent Miller Basaiawmoit, manderangko didiahachim.
