U·IATTIMGIPAONI
SHILLONG: Re·baenggipa 2024 bilsio ong·atna sienggipa Lok Sabha election da·o sepangbaroroengahaon, Meghalaya a·dokoba dingtang dingtang political dolrang da·o ka·sinsin ia election-na tarisamsona gita a·bachengtokengaha.
Budbar salo, BJP-ni gitcham dilgipa HM Shangpliang-ko NPP-ona rimchaksoani somoio NPP-ni national president Conrad Sangma-ba, re·baenggipa election-rangna kamrangko ka·chakatsochina gita NPP-ni state president-na dingtangmancha ge·etaniko on·angaha.
Shangpliang-ko da·o NPP-o rimnapahani gimin re·baenggipa bilsini Lok Sabha election-o ukon Shillong parliamentary seat-na NPP-ni candidate mingani cholrang dongenga ineba nikna gita man·aha.
Da·o dipet Shangpliang-na NPP-ni tikitko on·genma on·jawa NPP-ni national president Conrad Sangma, mamingkoba janapjahaoba a·doko sorkariko rikchengani somoionin NPP, Shillong seat-na darangkoba candidate-na minga dongkujachim ine kobor on·timgiparang parakataha.
Koborko on·ani gitade, Shillong Lok Sabha seat-o NPP-ni state president WR Kharlukhi-ko a·bachengo susachina gita NPP-ni dilgiparang nangnikachim indiba iako Kharlukhi an·tangan jechakahachim. Uni ja·man NESO-ni chairman Samuel Jyrwa-koba NPP-ni candidate ong·china gita dilgiparang sing·e niahachim indiba uaba iako jegalatskaaha ine kobor on·timgiparang parakataha.
Indake ong·engon, re·baenggipa 2024 bilsini Lok Sabha election-na United Democratic Party (UDP)-ba da·onin tarisamsona gita a·bachengengaha aro da·o dipet Shillong parliamentary seat-o sawa UDP-ni candidate ong·e susagen, uko ma·sikujaengoba UDP-ni tikitna UDP-ni general secretary Jemino Mawthoh aro a·dokni Cabinet Minister Paul Lyngdoh-ba susaani cholrang dongenga ine kobor man·soaha.