U·IATTIMGIPAONI
RESUBELPARA: North Garo Hills a·jao donggipa Bajengdoba PHE SDO-ni kosako FIR ka·gipani bidingo maming ja·kurangko de·jahani gimin Tura-ni contractor saksa Tarseng Ch Sangma, Bajengdoba police station-ni officer-in-charge (OC)-ni kosako badi ka·doangskaaha.
Contractor-na department-ni gamna nangenggipa tangka paisarangko gamna man·na gita uoniko ku·mitdu on·china dabiaha ine Bajengdoba-ni SDO KG Momin-ni kosako West Garo Hills a·jaoni contractor saksa Tarseng Sangma, Bajengdoba police station-ni OC-na FIR ka·doangahachim ine nikna man·a.
Indake ong·genchimoba, Bajengdoba police station-ni OC, FIR ka·a man·gipa officer-ni kosako ja·kurangko de·ani pal, ukosa okamate, SDO-ni kosako FIR ka·ani gimin ka·mikkenatpilaha ine ia contractor parakataha.
“A·songni niamde darangkoba mikkang niteani dongja aro pilaknan apsan ong·a. PHE-ni SDO ong·gija kamrangko ka·ahani giminsa anga uni kosako FIR-ko ka·aha aro uni kosako police-rang sandirokenba nanga gita ja·kurangko de·na nangachim,” ine Sangma parakataha.
SDO-ni kosako nanga gita ja·kurangko de·china ua PHE department-ni Commissioner & Secretary-naba u·iatmanaha ineba ia contractor parakataha.
Iani bidingo North Garo Hills a·jani SP BA Sangma-o sing·sandiaton, iani bidingo police-rang da·o nanga gita sandirokanirangko dakengkua aro sandirokanirang matchotahaon nanga gita ja·kurangko de·anggen ine parakataha.