U·IATTIMGIPAONI
SHILLONG: Meghalaya a·doko integrated gate aro weighbridge-rangko kulina gita songgigrikgimin contract-o dongimin niamrangko ja·rikjaengani a·sel a·dok sorkari gong krorni kror noksan ong·na gita nangenga ine Comptroller and General of India (CAG)-ni report-o parakaha.
CAG-ni report-o parakani gitade, a·doko integrated gate aro weighbridge-rangko kulina songgigrikgimin contract-o on·gimin niamrangko ja·rikjaengani a·sel a·dok sorkari, gong kror 23.75 tangkarangko gimaatna nangaha.
Weighbridge-rangko chalaina licence ra·giparangko Transport department-ni seokanio, weighbridge-rangko name chalaianio aro bilsini kajinarangko Transport department, somoi gita ra·jahani a·sel a·dok sorkari noksan ong·na gita nangaha ineba CAG report-o parakaha.
Iani a·selan bostu salgipa truck garirangni nangana bate bostu salruraaniko name nirokna gita miksonge weighbridge songani namgniko pe·aniba ong·enga ine CAG parakataha.
CAG-ni audit report-o parakani gitade, dam 13 biaprango dam 13 weighbridge-rangko kulina Transport department-ni ra·chakaoni damchetkosan da·o chalaienga aro ia damchet weighbridge-rangoni damsnide bilsini kajinarangko gamtokkujachim.
Ia weighbridge-rangko Transport department, jako ra·skajaha aro ia weighbridge-ko chalaienggipa manderangonikoba bilsini kajinarangko ra·na gita maming ja·kurangko de·skajaha ine janapatengon, iandake ia weighbridge-rangko chalaianio maming simsak nirokanirang dongjani a·sel gong kror 9.49-ni annual fee ba bilsini kajinarangko man·kujaenga ine CAG-ni audit report-o parakataha.
North Garo Hills a·jani Wageasi, East Jaintia Hills a·jani Ratacherra, West Garo Hills-ni Tikrikilla aro South Garo Hills a·jani Masighat-o weighbridge-rangko kulina gita songgigrikanio soi ka·grikaoni ja 10-11-ni ja·manba ia 2023 bilsini January jaona kingkingan ia weighbridge-rangko chalaikuja ine janapatengon, songgigrikanio soi ka·grikaoni jagittamni gisepon weighbridge-rangko chalaina niamrang dongachim ine CAG parakataha.
Ia songgigrikaniko somoi gita chu·sokatna department, maming ja·kurangko de·jahani a·sel gong kror 1.69 tangkarang noksan ong·na gita nangaha ineba CAG-ni report-o parakaha.