U·IATTIMGIPAONI
TURA: Chang 154-gipa Garo Hills Day-ko Robibar salo, Tura-ni District Auditorium-o dingtangmancha program-ko ong·atenba maniangaha.
Ia salko manianio Tura-ni MDC Bernard N Marak, mongsonggipa sokgipa ong·e jinmana aganprakangengon, 1869 bilsini September 24 tariko British-rangsa A·chikrangna songdongna gita dingtangmancha Garo Hills ine bimingko minge donangchengaha aro ua saloni da·alo Garo Hills-ni ong·baani bilsi 154 gapaha ine parakataha.
Garo Hills-ko badiaba political dolrangni krenganichi ba kamko ka·anichi man·aha ong·ja indiba A·chik ma·gitcham pagitchamrangni jatna a·dok chigana krengdilanichisa man·aha ineba Marak aganaha.
Marak-ni parakatani gitade, jensalo India a·song jakgitelaniko man·aha, India a·songni niam-bidiko pangchake a·brio songdongenggipa jatrangko chel·chakna gita Sixth Schedule-ko ra·gataha aro ia niamo pangchakesa a·brio songdongenggipa Tribal-rang, sorkarini bilrangoni jakgitel ong·e, Nokma-Sordar-rangchi a·dok-chigatangko nirokna, niam retirangko jakkalna aro jatni daka rikanirang baksana jatni ku·agananirangkoba ripinge rakkina gita bilko man·aha.
Sixth Schedule-o pangchake, A·chikrangnaba ia apsan niamkon on·ahaoba da·alo A·chikrang, an·tangtangna on·gimin bilrangko gimaatna nangengjok aro batesa gipin jatrangni ning·o dongna nangskaengjok ineba Tura-ni MDC suk ong·gijaniko parakataha.
Mikkangchi A·chik a·song gimikon ia Garo Hills Day-ko gisik ra·e manichina gitaba Marak didianiko on·angaha.
Ia salko manianio dingtangmancha A·chik a·songna aro Manipur-o ong·enggipa obostarangnaba jinma bi·chakangjolaha.