U·IATTIMGIPAONI
SHILLONG: Sorkari baksa tom·tomanina agangrikna a·bachengatenggipa Hynniewtrep National Liberation Council (HNLC) bobil dolni vice chairman Manbhalang Jyrwa, kamtangko wate doloni ong·kataha ine Bristibar salo, HNLC-ni general secretary Sainkupar Nongtraw parakataha.
Nongtraw-ni parakatani gitade, HNLC bobil dolni vice chairman Manbhalang Jyrwa, an·tangni kam watani chittiko HNLC-ni dilgiparangna on·angaha aro uamang uni kam wataniko ra·chakaha.
“Sufiyan A Hazarika, jekon Manbhalang Jyrwa ineba ma·sitokachim, ua an·tangni kam watani chittiko HNLC-ni dilgiparangna on·aha aro uni kam wataniko HNLC-ni dilgiparang ra·chakaha,” ine e-mail gita HNLC-ni general secretary parakataha.
HNLC-ni central executive committee, Teimiki Laloo-ko jadokna HNLC-ni gital vice chairman songskaaha ineba Nongtraw parakataha.
Jyrwa-ni kam watanganichi HNLC-ni bil aro niamrango maming dingtangani dongjawa ine janapatengon, HNLC-ko dilanio dingtangani donggenchimoba, HNLC-ni bebera·ani aro niamrangde apsan ong·e dongkuaigen ine Nongtraw parakataha.
“Manbhalang Jyrwa-ko Hynniewtrep jatni manderang, mande ska gitan mande ra·angkugen ine chinga ka·donga,” ine HNLC-ni general secretary parakataha.
Jyrwa-ni kam wataniko ong·gija dake chol ra·jachina sorkariko didiatengon, dolgnini gisepo a·bachengatgipa agangrikanikon sorkari, gisik on·bate ra·angkuchina ine Nongtraw parakataha.
“Jyrwa-ni kam wataniara sorkari baksa tom·tomanina agangrikanio maming nangchakeani dongjawa aro iako pilakan ma·sie ra·na nanga. Da·o sorkari baksa agangrikaniko HNLC-ni gital songako man·gipa vice chairman dilangskagnok,” ine HNLC-ni general secretary parakataha.