U·IATTIMGIPAONI
SHILLONG: Adita salrangna skang, Meghalaya aro Assam a·dokni sima jolo donggipa West Jaintia Hills a·jani Lapangap songo, Pnar aro Karbi manderangni gisepo dinggrikani ong·kattaiahani gimin Meghalaya a·dokni Chief Minister Conrad K Sangma, Assam-ni Chief Minister Himanta Biswa Sarma baksa agangrikataha.
Ia a·sel ong·gipa biapona a·dokni Deputy Chief Minister aro Home Minister Prestone Tynsong re·ange nina sienga ineba kobor on·aha.
“Ia a·selni bidingo Chief Minister, Assam-ni Chief Minister baksa agangrikataha aro anga bebera·a iani bidingo a·dok damgnini sorkarirang bakan tom·e chanchirimanggen,” ine MDA 2.0 sorkarini ku·wattimgipa Paul Lyngdoh aganaha.
A·dok damgnini gisepo meligrikna man·jaenggipa biaprango so·sojengjeng ong·aniko nikna man·rongenga ine janapatengon, “Assam a·dok baksa meligrikna man·jaenggipa sima jolrango songgigrikaniko dake tom·tomaniko ra·bapilna man·ahaon, a·dok damgnini golmalrangko namatna man·gnok aro an·ching dam 12 biaprangoni da·o damdok biaprangsan dongaiaha,” ine Lyngdoh aganaha.
A·dok damgnini gisepo iandake dinggrikanirangko bon·atna gita Meghalaya sorkari, ia 2023 bilsi bon·na skangan Assam a·dok baksa bon·kamgipa songgigrikanio soi ka·na ka·dongenga ineba Lyngdoh parakataha.
“Angni kobor man·soani gitade, a·dokni deputy CM sakgnian, ia so·sojengjeng ong·gipa biaprangona bakan re·angna sienga,” ine ua aganaha.
Cabinet Minister-ni parakatani gitade, Meghalaya Police-o kam ka·gipa sipairang chu·ongjaengani a·sel so·sojengjeng ong·enggipa a·dok damgnini simarangko name nirokna man·jaenga.
“Iani gimin chinga da·o sak 2500 police-rangna training-ko on·engaha. Meghalaya Police-o kam ka·giparangni chu·onggijaniko namatna gita bakan sak 2500 police-rangkoba rimdapkugen,” ine ua aganaha.
Indake ong·engon, Mongolbar salo ia Lapangap songo dolgni dinggrikani ja·man, dolgnichipaknin mikrakbate nirok sandianirangko dakengaha aro da·o tom·tomanirangko man·piltaiengaha ine West Jaintia Hills a·jani Deputy Commissioner BS Sohliya parakatskaaha.