U·IATTIMGIPAONI
SHILLONG: Re·baenggipa 2024 bilsini Lok Sabha election-na skang, LPG cylinder-ni damko ma·mong sorkari gong 158/-chi komiatahaoba petrol aro diesel-ni damrangde komiskakujaengani a·sel gari gora jakkalenggipa manderangsan ong·aigija, jinmako salruragipa garirango songrena nangenggipa manderangba koros ong·e neng·nikanirangko chagrongna nangtokenga.
Shillong-o da·o petrol-ko litre-prakon gong 98/- ka·e brena nangengani a·sel gari gora jakkalenggipa manderang neng·nikanirangko chagrongna nangtokenga.
Shillong songjinmao petrol pump-ko chalaienggipa mande saksani parakatani gitade, sal 10-mang skangsan petrol-ni damko 50 paisamangni gita bariattaiaha aro a·dok sorkari, petrol-ni kajinako bariatani ja·mansa petrol-ni damba tang·doangtaiaha.
Sombar salona kingkingde Shillong-o petrol-ni dam gong 97.98 ong·ahachim.
Adita bilsirangna skang, COVID sajinmani somoiosa a·song gimikon petrol-ni damrangko bariattokahachim indiba da·o COVID namangani ja·manoba petrol aro diesel-ni damrangko komiatpilade dongskajahachim.
Re·baenggipa bilsion Lok Sabha election-ko ong·atna siengahani gimin ma·mong sorkari, manderangko salna gita bakan petrol aro diesel-ni damrangko komiatnaba gnang ine manderang ka·dongsotokskaenga.
LPG cylinder-ni damko adita salrangna skangsan ma·mong sorkari komiatahaoba, kg 19 ong·gipa LPG cylinder-ni damko Public Sector Oil Marketing Company (OMC)-rang, cylinder ge·prakon gong 209-chi bariatskaaha aro uandaken October 1 tarikonide kg 19 ong·gipa LPG cylinder-ko dam rakbate brena nangtokskaengaha.