U·IATTIMGIPAONI
SHILLONG: Salgro Salaramo donggipa gimik ge 25 Lok Sabha seat-rangko chegopna gita BJP nisan ka·enga ine Meghalayani gitcham BJP president Ernest Mawrie Mongolbaro aganaha.
Election-ni kamrangni bidingo chanchirimna gita adita salrangna skang, Guwahatio tom·aniko ong·ataha jeon, Salgro Salaram gimikni State president-rang aro BJP North East coordinator aro National spokesperson Sambit Patra dongpaaha ine Mawrie u·iataha.
“Re·baenggipa Lok Sabha poll-rangna party-ko maidake bilakatsogen aro maidake kamrangko ka·gen uarangni bidingo tom·anio chanchirimaha” ine ua aganaha.
Party, Salgro Salaramni Lok Sabha seat-rangko dal·e ra·enga ine aganengon, “ian changde chinga Salgro Salaramni gimik ge 25 seat-rangkon chegopna jotton ka·enga. Mitampak a·dokrango NEDA baksa bakrimgiparang donga indiba gipinrangode BJP-an ong·aia,” gitcham President aganaha.
“Bebegita chinga seat gimikkon chegopna man·ode Salgro Salaram a·dokrangko tang·dobatatna man·gen,” ua agandapaha.
Unomitingo A·dokni ge·gni Lok Sabha seat-rangni bidingo aganengon, iani bidingo chinga chanchia dongkuja indiba chanchirike nianirangde dongengjok ine BJP national vice president aro State in-charge Chuba Ao aganaha.
Da·o dipet party tikitna dorgasto galgiparangde dongkuja ine aganengon, “Chinga namedake chanchirikenba somoi sokjokon bakrime kam ka·gen” ineba Ao aganaha.